Toshkent viloyati Parkent tumanida akasining bog‘dorchilikka ixtisoslashgan fermer xo‘jaligiga tegishli 5 gektar yer maydonini boshqa bir fuqaroga 1 million AQSh dollariga sotmoqchi bo‘lgan shaxs qo‘lga olindi. Bu haqda “O‘zbekiston 24” telekanalida ma’lum qilindi.
Buning uchun u avval mazkur yer maydonini fermer xo‘jaligi ixtiyoridan chiqarib, tuman hokimligi zaxirasiga qaytarishni, so‘ngra esa hokimlikdagi tanishlari orqali xaridor fuqaroning nomiga rasmiylashtirib berishni rejalashtirgan.
DXX Toshkent viloyati boshqarmasi xodimlarining viloyat prokuraturasi bilan hamkorlikda o‘tkazgan tezkor tadbiri davomida firibgar shaxs so‘ralgan puldan 100 ming dollarni avans sifatida olgan vaqtida ashyoviy dalillar bilan ushlangan.
Avvalroq Zangiotada sug‘oriladigan yer maydonini noqonuniy sotib yuborgan fermer xo‘jaliklari rahbarlariga nisbatan jinoyat ishi qo‘zg‘atilgani, Buxoroda hujjatlarni soxtalashtirish orqali yer ajratish evaziga dehqondan pora olgan shaxs qo‘lga olingani, Surxondaryoda jiyani nomiga 4,5 sotix yerni auksionsiz ajratib, uni 180 million so‘mga sotmoqchi bo‘lgan tuman qurilish bo‘limi boshlig‘i ushlangani to‘g‘risida xabar berilgandi.
Izoh (0)