SFI Management Group va O‘zbekiston hukumati “O‘zmetkombinat”, Olmaliq kon-metallurgiya kombinati va “O‘zikkilamchiranglimetall”ni ishonchli boshqarish to‘g‘risidagi shartnomani bekor qildi, deb xabar bermoqda Spot kompaniya matbuot xizmatiga tayanib.
Kompaniya “O‘zmetkombinat”ni 2017-yildan buyon, “Olmaliq kon-metallurgiya kombinati” va “O‘zikkilamchiranglimetall”ni esa 2018-yildan buyon boshqargan. SFI Management Group’da aytilishicha, inqiroz menejeri sifatida qisqa vaqt ichida korxonalarning foydalanilmagan imkoniyatlaridan foydalanishga, ishlab chiqarish jarayonini optimallashtirishga, barcha ko‘rsatkichlarni oshirishga erishildi.
Xabarda har uchala korxonadagi o‘zgarishlar haqida gapirilgan. Xususan, Olmaliq kon-metallurgiya kombinati xalqaro moliyaviy hisobot standartlariga o‘tishni boshladi (istiqbolda IPO/SPO o‘tkazish imkonini beradi), daromad 204 foizga, sof foyda esa 225 foizga o‘sgan. “O‘zmetkombinat” sof foydasi 145 foizni, “O‘zikkilamchiranglimetall”niki 220 foizni tashkil etgan.
Kompaniyada hukumat tomonidan bildirilgan ishonchni oqlash uchun bor kuch sarflangani ta’kidlangan har uchala korxona ochiq bozor sharoitida mustaqil faoliyatga tayyor holga keltirilgani qayd etilgan. Shu sababli 17-fevral kuni kelishuvlar bekor qilingan.
SFI Management Group kimga tegishli?
2018-yil avgustida kompaniya O‘zbekistondagi loyihalarga Alisher Usmonov homiyligida jalb qilingani haqida xabar berilgandi. Keyinchalik tadbirkor SFI’ning egasi Fattoh Shodiev ekanligini rad etgan, ammo uning akasi va do‘stining oilasiga tegishli ekanligini bildirgan.
Hozirda kompaniya saytida O‘zbekistondagi faqat ikkita loyiha — “Paxtakor” FK va “Toshkent metallurgiya zavodi” ko‘rsatilgan. Avvalroq ro‘yxatda Evroasia Insurance, “O‘rtachirchiqparranda” va “O‘zkimyofarm” ham bo‘lgan.
Ma’lumot uchun, SFI Management Group MChJ xorijiy korxonasi korxonalarni bozor munosabatlariga moslashtirish, xalqaro standartlarni joriy etish, xorijiy mutaxassislar va investitsiyalarni jalb qilishda faol ishtirok etish orqali O‘zbekistonning iqtisodiy rivojlanishiga hissa qo‘shish maqsadida tashkil etilgan.
Izoh (0)