Markaziy bank hududlararo tekshiruv davomida qonunbuzarliklar qayd etilgan banklarga nisbatan jazo choralarini qo‘lladi, deya xabar bermoqda bank matbuot xizmati.
Ta’kidlanishicha, Markaziy bank tomonidan respublikada bank xizmatlarining ommabopligini oshirish, shu jumladan, naqd pulsiz hisob-kitoblarni rivojlantirish orqali joylarda bank kartalari egalariga xizmat ko‘rsatuvchi bankomat va terminallar tarmog‘ini kengaytirish borasida zarur chora-tadbirlar amalga oshirilmoqda. Hozirda tijorat banklarining mijozlarga xizmat ko‘rsatuvchi barcha bo‘linmalari terminallar bilan to‘liq ta’minlangan.
Qayd etilishicha, shunga qaramay, ayrim hollarda joylardagi ba’zi tijorat banklarining bo‘linmalarida aholiga tegishli bo‘lgan bank kartalari orqali to‘lovlarni amalga oshirishni rad etish, asossiz ravishda terminallardan foydalanmaslik hamda karta egalariga bank kartasidagi pul mablag‘larini terminal orqali naqdlashtirib bermaslik bilan bog‘liq holatlar kuzatilmoqda.
Bu esa iste’molchilarning huquqi va qonuniy manfaatlari buzilishiga olib kelmoqda hamda haqli e’tirozlarga sabab bo‘lmoqda.
Ta’kidlanishicha, 2021-yilda Markaziy bankning Bank xizmatlari iste’molchilarining huquqlarini himoya qilish xizmati tomonidan Xorazm, Samarqand, Jizzax, Sirdaryo, Namangan, Surxondaryo, Qashqadaryo, Toshkent viloyatlari va Qoraqalpog‘istonda nazorat tadbirlari o‘tkazilgan.
Ushbu hududlardagi qoidabuzarliklarga yo‘l qo‘ygan tijorat banklariga nisbatan (Agrobank, Xalq banki, Mikrokreditbank, Milliy bank, O‘zsanoatqurilishbank, Ipoteka bank, Hamkorbank, Qishloq qurilish bank, Asaka bank, Aloqabank, Turonbank, Trastbank, Ipak yo‘li banki, Davrbank va Infinbank) belgilangan tartibda jarima sanksiyalari qo‘llanildi.
Shu bilan birga, Markaziy bank tomonidan tijorat banklariga terminallardan foydalanishda yo‘l qo‘yilgan kamchiliklarni bartaraf etish va kelgusida bunday holatlarning takrorlanmasligi uchun zaruriy choralar ko‘rish yuzasidan tegishli ko‘rsatmalar berildi hamda ularning ijrosi doimiy nazoratga olindi.
Markaziy bank tijorat banklarini kelgusida ularning joylardagi barcha muassasalarida to‘lovlarni terminallar orqali amalga oshirish holati bo‘yicha nazorat tadbirlarini o‘tkazishni davom ettirishi, shuningdek, tijorat banklaridan terminallardan foydalanishda qoidabuzarlikka yo‘l qo‘ygan bank xodimlariga nisbatan egallab turgan lavozimidan chetlatishgacha bo‘lgan jazo choralari qo‘llanilishini talab etishi to‘g‘risida ogohlantirdi.
Bundan avval “Asakabank” va MasterCard pullari qayta yechib olingan fuqarolarning muammosini hal etayotgani, O‘zbekistonda “naqdlashtiruvchi korxonalar” doirasidagi mojarolar va tadbirkorlarning noroziliklariga oydinlik kiritilgani hamda O‘zbekistonda inflyatsiya darajasi 2021-yilda 9—10 foiz atrofida bo‘lishi kutilayotgani haqida xabar berilgandi.
Izoh (0)