SFI Management Group ва Ўзбекистон ҳукумати «Ўзметкомбинат», Олмалиқ кон-металлургия комбинати ва «Ўзиккиламчиранглиметалл»ни ишончли бошқариш тўғрисидаги шартномани бекор қилди, деб хабар бермоқда Spot компания матбуот хизматига таяниб.
Компания «Ўзметкомбинат»ни 2017 йилдан буён, «Олмалиқ кон-металлургия комбинати» ва «Ўзиккиламчиранглиметалл»ни эса 2018 йилдан буён бошқарган. SFI Management Group’да айтилишича, инқироз менежери сифатида қисқа вақт ичида корхоналарнинг фойдаланилмаган имкониятларидан фойдаланишга, ишлаб чиқариш жараёнини оптималлаштиришга, барча кўрсаткичларни оширишга эришилди.
Хабарда ҳар учала корхонадаги ўзгаришлар ҳақида гапирилган. Хусусан, Олмалиқ кон-металлургия комбинати халқаро молиявий ҳисобот стандартларига ўтишни бошлади (истиқболда IPO/SPO ўтказиш имконини беради), даромад 204 фоизга, соф фойда эса 225 фоизга ўсган. «Ўзметкомбинат» соф фойдаси 145 фоизни, «Ўзиккиламчиранглиметалл»ники 220 фоизни ташкил этган.
Компанияда ҳукумат томонидан билдирилган ишончни оқлаш учун бор куч сарфлангани таъкидланган ҳар учала корхона очиқ бозор шароитида мустақил фаолиятга тайёр ҳолга келтирилгани қайд этилган. Шу сабабли 17 февраль куни келишувлар бекор қилинган.
SFI Management Group кимга тегишли?
2018 йил августида компания Ўзбекистондаги лойиҳаларга Алишер Усмонов ҳомийлигида жалб қилингани ҳақида хабар берилганди. Кейинчалик тадбиркор SFI’нинг эгаси Фаттоҳ Шодиeв эканлигини рад этган, аммо унинг акаси ва дўстининг оиласига тегишли эканлигини билдирган.
Ҳозирда компания сайтида Ўзбекистондаги фақат иккита лойиҳа — «Пахтакор» ФК ва «Тошкент металлургия заводи» кўрсатилган. Аввалроқ рўйхатда Эвроасиа Insurance, «Ўртачирчиқпарранда» ва «Ўзкимёфарм» ҳам бўлган.
Маълумот учун, SFI Management Group МЧЖ хорижий корхонаси корхоналарни бозор муносабатларига мослаштириш, халқаро стандартларни жорий этиш, хорижий мутахассислар ва инвестицияларни жалб қилишда фаол иштирок этиш орқали Ўзбекистоннинг иқтисодий ривожланишига ҳисса қўшиш мақсадида ташкил этилган.
Изоҳ (0)