Vengriyaning Budapesht shahrida 17-fevral kuni Vengriya va O‘zbekiston ishbilarmon doiralarining bir qator vakillarini jamlagan biznes-forum bo‘lib o‘tdi, deb xabar bermoqda Investitsiyalar va tashqi savdo vazirligi matbuot xizmati.
Xabarga ko‘ra, forumning ochilish marosimida O‘zbekiston bosh vazirining o‘rinbosari — investitsiyalar va tashqi savdo vaziri Sardor Umurzoqov va Vengriya tashqi ishlar va tashqi iqtisodiy aloqalar vaziri Peter Siyyarto ishtirok etdi.
Biznes-forum davomida, shuningdek, vazirliklar, idoralar, tarmoq birlashmalari hamda O‘zbekiston va Vengriyaning yetakchi kompaniyalari rahbarlari o‘rtasida “G2B” va “V2V” uchrashuvlari o‘tkazildi. Unda ishtirokchilar qo‘shma korxonalar tashkil etish va o‘zaro manfaatli savdo bitimlarini tuzish masalalarini atroflicha muhokama qilish imkoniyatiga ega bo‘ldi.
Tadbir yakunida O‘zbekistonning turli hududlarida parrandachilik, baliqchilik, chorvachilik va oziq-ovqat sanoati sohalarida 12 ta investitsiya loyihalarini amalga oshirish bo‘yicha qator ikki tomonlama bitimlar imzolangan. Bundan tashqari, 76 ta yangi istiqbolli investitsiya loyihasi ustida birgalikda ishlashni davom ettirishga kelishib olingan bo‘lib, ulardan 26 tasi bo‘yicha O‘zbekiston va Vengriya taraflardan hamkorlar aniqlangan va tegishli muzokaralar olib borilmoqda.
Shuningdek, Investitsiyalar va tashqi savdo vazirligi huzuridagi Eksportni rag‘batlantirish agentligi va Savdoni rivojlantirish bo‘yicha Vengriya agentligi o‘rtasida hamkorlik to‘g‘risida bitim, o‘zaro sayyohlik oqimlari hajmini ko‘paytirish bo‘yicha O‘zbekiston Xususiy turizm tashkilotlari Assotsiatsiyasi hamda Vengriya Sayyohlik agentliklari va turoperatorlari Assotsiatsiyasi o‘rtasida hamkorlik to‘g‘risida bitim, shuningdek, O‘zbekistonda farmatsevtika sohasida ta’lim tizimini takomillashtirish bo‘yicha O‘zbekiston farmatsevtika sanoatini rivojlantirish agentligi hamda Vengriya farmakologik klasteri o‘rtasida hamkorlik to‘g‘risida bitim imzolangan.
Izoh (0)