Марказий банк ҳудудлараро текширув давомида қонунбузарликлар қайд этилган банкларга нисбатан жазо чораларини қўллади, дея хабар бермоқда банк матбуот хизмати.
Таъкидланишича, Марказий банк томонидан республикада банк хизматларининг оммабоплигини ошириш, шу жумладан, нақд пулсиз ҳисоб-китобларни ривожлантириш орқали жойларда банк карталари эгаларига хизмат кўрсатувчи банкомат ва терминаллар тармоғини кенгайтириш борасида зарур чора-тадбирлар амалга оширилмоқда. Ҳозирда тижорат банкларининг мижозларга хизмат кўрсатувчи барча бўлинмалари терминаллар билан тўлиқ таъминланган.
Қайд этилишича, шунга қарамай, айрим ҳолларда жойлардаги баъзи тижорат банкларининг бўлинмаларида аҳолига тегишли бўлган банк карталари орқали тўловларни амалга оширишни рад этиш, асоссиз равишда терминаллардан фойдаланмаслик ҳамда карта эгаларига банк картасидаги пул маблағларини терминал орқали нақдлаштириб бермаслик билан боғлиқ ҳолатлар кузатилмоқда.
Бу эса истеъмолчиларнинг ҳуқуқи ва қонуний манфаатлари бузилишига олиб келмоқда ҳамда ҳақли эътирозларга сабаб бўлмоқда.
Таъкидланишича, 2021 йилда Марказий банкнинг Банк хизматлари истеъмолчиларининг ҳуқуқларини ҳимоя қилиш хизмати томонидан Хоразм, Самарқанд, Жиззах, Сирдарё, Наманган, Сурхондарё, Қашқадарё, Тошкент вилоятлари ва Қорақалпоғистонда назорат тадбирлари ўтказилган.
Ушбу ҳудудлардаги қоидабузарликларга йўл қўйган тижорат банкларига нисбатан (Агробанк, Халқ банки, Микрокредитбанк, Миллий банк, Ўзсаноатқурилишбанк, Ипотека банк, Ҳамкорбанк, Қишлоқ қурилиш банк, Асака банк, Алоқабанк, Туронбанк, Trastбанк, Ипак йўли банки, Даврбанк ва Infinbank) белгиланган тартибда жарима санкциялари қўлланилди.
Шу билан бирга, Марказий банк томонидан тижорат банкларига терминаллардан фойдаланишда йўл қўйилган камчиликларни бартараф этиш ва келгусида бундай ҳолатларнинг такрорланмаслиги учун зарурий чоралар кўриш юзасидан тегишли кўрсатмалар берилди ҳамда уларнинг ижроси доимий назоратга олинди.
Марказий банк тижорат банкларини келгусида уларнинг жойлардаги барча муассасаларида тўловларни терминаллар орқали амалга ошириш ҳолати бўйича назорат тадбирларини ўтказишни давом эттириши, шунингдек, тижорат банкларидан терминаллардан фойдаланишда қоидабузарликка йўл қўйган банк ходимларига нисбатан эгаллаб турган лавозимидан четлатишгача бўлган жазо чоралари қўлланилишини талаб этиши тўғрисида огоҳлантирди.
Бундан аввал «Асакабанк» ва MasterCard пуллари қайта ечиб олинган фуқароларнинг муаммосини ҳал этаётгани, Ўзбекистонда «нақдлаштирувчи корхоналар» доирасидаги можаролар ва тадбиркорларнинг норозиликларига ойдинлик киритилгани ҳамда Ўзбекистонда инфляция даражаси 2021 йилда 9—10 фоиз атрофида бўлиши кутилаётгани ҳақида хабар берилганди.
Изоҳ (0)