Braziliyaning beshta shtati vaksina yetishmasligi sababli koronavirusga qarshi emlashni to‘xtatdi, deb xabar bermoqda mahalliy telekanal Globo.
Ma’lumotlarga ko‘ra, emlashlar Rio-de-Janeyro, Baiya, Matu-Grosu, Salvador va Kuyaba shaharlarida to‘xtatilgan. Telekanal ma’lumotlariga ko‘ra, ushbu shaharlarda vaksinaning birinchi dozasini olganlar ikkinchi doza bilan emlanishi mumkin. Hali birinchi dozani qabul qilmaganlar vaksinaning yangi partiyasi kelgunicha emlanmaydi.
Ta’kidlanishicha, Rio-de-Janeyro shahri meri Eduardo Paes poytaxtda emlashlar vaksina tanqisligi sababli kelasi haftagacha to‘xtatilishini aytgan.
“Menga yangi dozalar hali kelmaganligi haqida xabar berishdi. Shu munosabat bilan biz emlash kampaniyamizni to‘xtatishga majbur bo‘lamiz”, — deb yozgan shahar meri Twitter’dagi sahifasida.
Uning so‘zlariga ko‘ra, shaharda allaqachon 245 ming kishi emlangan va emlash kampaniyasi kelasi hafta Xitoyning CoronaVac vaksinasining yangi partiyasi kelishi bilan qayta boshlanadi.
Jons Hopkins universitetining ma’lumotlariga ko‘ra, COVID-19 kasalligiga chalinish bo‘yicha Braziliya dunyoda AQSh va Hindistondan keyin uchinchi o‘rinda turadi. Pandemiya davrida mamlakatning 9 milliondan ortiq aholisi koronavirus bilan kasallangan, kasallikdan vafot etganlar soni 200 mingdan oshadi.
Mavzuga doir: Shprits yetishmasligi sababli millionlab yaponiyaliklar COVID-19’ga qarshi vaksinasiz qoladi
Bundan tashqari, Vengriya Yevropa Ittifoqi dasturi bo‘yicha vaksina juda sekin kelayotganidan shikoyat qilgan. Ta’kidlanishicha, mamlakatga haftasiga 100 ming dozadan ham kam vaksina olib kelinmoqda. Shuning uchun Vengriya qo‘shimcha ravishda Rossiya va Xitoy vaksinalarini sotib olish bo‘yicha muzokaralar o‘tkazgan.
Bundan tashqari, Germaniya sog‘liqni saqlash vaziri Yens Shpan COVID-19 koronavirusiga qarshi vaksina yetishmasligi sababli mamlakat qiyin davrga duch kelishi haqida aytdi.
Yevrokomissiyaning sog‘liqni saqlash bo‘yicha a’zosi Stella Kiriakidis AstraZeneca kompaniyasiga COVID-19 vaksinasini yetkazib berish jarayonida o‘zgarishlar yuzaga kelgani uchun aniqlik kiritishni so‘rab, xat yubordi. Ta’kidlanishicha, kompaniya Yevropa Ittifoqiga dastlab kelishilganidan ancha kam dozalarni yuborgan.
Uning so‘zlariga ko‘ra, ilgari Yevropa Ittifoqi ushbu kompaniya vaksinani yaratishi va uni ishlab chiqarishini moliyalashtirib, ularni tez yetkazib berish uchun oldindan buyurtmalar bergan. Endi rasmiy Bryussel “shartnomaning to‘liq bajarilishini” xohlamoqda.
Izoh (0)