AQSh prezidenti Jo Bayden Oq uydagi hayotini “oltin qafas”da yashash deb atadi. Bu haqda Associated Press xabar berdi.
“Ertalab uyg‘onganimda rafiqam Jillga qarab, ‘qayerga kelib qoldik o‘zi?’ deyman”, — degan Bayden.
Siyosatchi uy xizmatchilarining uni kutib turishiga va egniga paltosini kiydirib qo‘yishiga hanuzgacha ko‘nika olmayotganini aytgan.
Bayden Barak Obama ma’muriyatida vitse-prezident bo‘lib ishlagan paytlarida Oval ofisga yuz martadan ko‘p tashrif buyurgani, ammo ilgari Oq uyning turar joy qismida bo‘lmaganini ta’kidladi. Uning so‘zlariga ko‘ra, u yer vitse-prezident qarorgohidan sezilarli darajada farq qiladi.
Shunga qaramay, Bayden prezidentlikni allaqachon o‘zlashtirganini ishonch bilan qayd etdi.
“Ba’zan, hamma narsa juda tez sodir bo‘layotgani sababli to‘rt yil o‘tib ketgandek tuyuladi”, — dedi u.
20-yanvar kuni bo‘lib o‘tgan inauguratsiyadan so‘ng AQSh prezidenti Jo Bayden va uning rafiqasi Jill o‘zlarining ikki nemis ovcharkasi —Meyjor va Chemp bilan Oq uyga ko‘chib o‘tgan.
Yanvar oyi oxirida Bayden Oval ofisdan avvalgi prezident Donald Tramp tomonidan o‘rnatilgan diyeta kolalariga buyurtma berish tugmachasini olib tashlagani ma’lum bo‘ldi. Shuningdek, u qizil-jigarrang kursini to‘q-jigarrang tusdagi charm kursiga almashtirdi.
3-fevral kuni Jo Bayden Oq uyga nabirasi Bo Baydenga atab belanchak olib kelgani haqida xabar berilgan.
Izoh (0)