Бразилиянинг бешта штати вакцина етишмаслиги сабабли коронавирусга қарши эмлашни тўхтатди, деб хабар бермоқда маҳаллий телеканал Globo.
Маълумотларга кўра, эмлашлар Рио-де-Жанейро, Баия, Мату-Гросу, Сальвадор ва Куяба шаҳарларида тўхтатилган. Телеканал маълумотларига кўра, ушбу шаҳарларда вакцинанинг биринчи дозасини олганлар иккинчи доза билан эмланиши мумкин. Ҳали биринчи дозани қабул қилмаганлар вакцинанинг янги партияси келгунича эмланмайди.
Таъкидланишича, Рио-де-Жанейро шаҳри мэри Эдуардо Паэс пойтахтда эмлашлар вакцина танқислиги сабабли келаси ҳафтагача тўхтатилишини айтган.
«Менга янги дозалар ҳали келмаганлиги ҳақида хабар беришди. Шу муносабат билан биз эмлаш кампаниямизни тўхтатишга мажбур бўламиз», — деб ёзган шаҳар мэри Twitter’даги саҳифасида.
Унинг сўзларига кўра, шаҳарда аллақачон 245 минг киши эмланган ва эмлаш кампанияси келаси ҳафта Хитойнинг CoronaVac вакцинасининг янги партияси келиши билан қайта бошланади.
Жонс Ҳопкинс университетининг маълумотларига кўра, COVID-19 касаллигига чалиниш бўйича Бразилия дунёда АҚШ ва Ҳиндистондан кейин учинчи ўринда туради. Пандемия даврида мамлакатнинг 9 миллиондан ортиқ аҳолиси коронавирус билан касалланган, касалликдан вафот этганлар сони 200 мингдан ошади.
Эслатиб ўтамиз, баъзи мамлакатларда вакцина танқислиги юзага келмоқда. Хусусан, Италия коронавирусга қарши вакцина танқислигига дуч келгани ҳақида хабар берилганди. Маълум қилинишича, мамлакатда етказиб берилган вакциналар сони илгари режалаштирилганидан 60 фоизга кам.Бундан ташқари, Венгрия Европа Иттифоқи дастури бўйича вакцина жуда секин келаётганидан шикоят қилган. Таъкидланишича, мамлакатга ҳафтасига 100 минг дозадан ҳам кам вакцина олиб келинмоқда. Шунинг учун Венгрия қўшимча равишда Россия ва Хитой вакциналарини сотиб олиш бўйича музокаралар ўтказган.
Бундан ташқари, Германия соғлиқни сақлаш вазири Йенс Шпан COVID-19 коронавирусига қарши вакцина етишмаслиги сабабли мамлакат қийин даврга дуч келиши ҳақида айтди.
Еврокомиссиянинг соғлиқни сақлаш бўйича аъзоси Стелла Кириакидис AstraZeneca компаниясига COVID-19 вакцинасини етказиб бериш жараёнида ўзгаришлар юзага келгани учун аниқлик киритишни сўраб, хат юборди. Таъкидланишича, компания Европа Иттифоқига дастлаб келишилганидан анча кам дозаларни юборган.
Унинг сўзларига кўра, илгари Европа Иттифоқи ушбу компания вакцинани яратиши ва уни ишлаб чиқаришини молиялаштириб, уларни тез етказиб бериш учун олдиндан буюртмалар берган. Энди расмий Брюссель «шартноманинг тўлиқ бажарилишини» хоҳламоқда.
Изоҳ (0)