Англия Премьер Лигаси – дунёнинг энг кучли футбол чемпионати сифатида қабул қилинган. Табиийки, у ерда дунёнинг энг яхши футболчилари жамланган, кучли рақобатда ютиб чиқиш эса ҳаммага ҳам насиб этавермайди. Шунинг учун Англиядаги футболчилар спорт формасини ушлаб туриш учун қўлидан келган барча ишни қилади. Боиси бир мартага мураббийнинг ишончи йўқотилса, уни қайта тиклаш деярли имконсиздир. Афсуски, бундай ҳолатга тушиб қолганларнинг сони кам эмас. Демак, қуйида айнан шу сабаблар ва кутилган ўйинни намойиш этолмаган, бироқ бошқа чемпионатга йўл олиб, ўз ўрнини топган таниқли футболчилар ҳақида фикр юритилади.
Ромелу Лукаку
Премьер Лигада 113 та гол уриб, лига тарихидаги йигирманчи энг яхши тўпурарга айланган Ромелу Лукакунинг иқтидорига ҳеч ким шубҳа қилмаган. Бироқ «Эвертон»дан 75 миллион еврога сотиб олинган бельгиялик футболчи «Манчестер Юнайтед»да кутилган ўйинни намойиш этди дейиш қийин. У 96 та ўйинда 42 та гол урди, аммо на мухлислар ва на мураббийлар штаби уни ўзлариники деб қабул қилди.
«Англияда ўйнаганимда, мени танбал деб аташарди, мени кам югуришда ва ҳеч нарса қилмасликда айблашарди, – деганди Лукаку 2020 йили берган интервьюсида. – Ҳозир мен ва эришаётган ютуқларимга қаранг. Англияда ҳам шундай қила олган бўлардим».
Бу гаплари билан у «Интер»га ўтгани ҳақида гапирган. Дарҳақиқат, Антонио Конте бошчилигида Лукаку аллақачон голлари сонини 50 тадан ошириб олди. Унинг ёрдамисиз, итальян клуби Европа Лигаси финалига чиқа олмаган бўларди. Унинг ўзи эса мусобақада йилнинг энг яхши футболчиси деб топилди. Бундан ташқари «Интер» айнан унинг ёрдами билан 2010 йилдан бери илк марта Скудетто учун жиддий кураш олиб боришни бошлади.
Крис Смоллинг
Ҳарри Магуайр билан шартнома имзолангандан сўнг «Юнайтед» фахрийси Крис Смоллинг жамоада ўз ўрнини йўқотиб бўлганди. Виктор Линдельоф ва Эрик Байи каби ўйинчиларнинг соясида қолиб кетишдан чарчаган инглиз исталган жойга, ҳатто нотаниш лигага ҳам кетишга тайёр эди.
«Рома» унинг янги уйига айланишини ҳеч ким тахмин ҳам қила олмас эди, аммо якунда шундай бўлиб чиқди – дастлаб ижара асосида ўйнаган ҳимоячи Италия пойтахтида доимий рўйхатдан ўтиш учун қўлидан келган барча ишни қилди. Шу тариқа Смоллинг бугунга кунга қадар 50 та учрашувда қатнашишга улгурди. 31 ёшида кўпчилик унинг фаолиятида шўнғиш кузатилишини айтганди, аммо у римликларнинг ёқимтойига айланиб, ишончли ўйинлар кўрсата бошлади. «Манчестер Юнайтед»да эса бу ҳеч қачон содир бўлмаган. Смоллинг нари борса жамоадаги тажрибали ўйинчилардан бири сифатида қабул қилинарди.
«Манчестер Юнайтед»да қолиш энг осон йўл бўларди, аммо мен «Рома»га нимадир ўрганиш учун келганман», – деганди Смолинг The Telegraph нашрига берган интервьюсида.
Серж Гнабри
16 ёшида «Арсенал»га қўшилган ва кейинчалик «Вест Бромвич» таркибига ҳам кира олмаган футболчининг Европанинг энг кучли клубидаги асосий фигурага айланишига ишониш қийин эди. Аммо вақтида инглизлар томонидан қадрланмаган Гнабри бугунги кунда «Бавария» билан Бундеслига, Чемпионлар Лигаси ва клублар ўртасидаги Жаҳон чемпионатида ғолиб чиқишга улгурди.
Гнабри Англиядаги фаолияти унга ҳеч нарса бермаслигини англаб, ватани Германияга қайтиб кетади ва у ерда аввал «Вердер», кейин «Ҳоффенҳайм»да ўйнайди. У ердаги ўйинлар эса унга «Бавария» таркибига қўшилишга имкон берди.
Ўтган мавсум Чемпионлар Лигаси баҳсларида тўққизта ўйинда тўққизта гол муаллифига айланган футболчи ҳозирда ҳақли равишда Франк Риберининг ўрни ва рақамига эгалик қилмоқда.
Генрих Мхитарян
Премьер Лига тарихидаги ягона арманистонлик футболчи Генрих Мхитарян маҳаллий мухлислар ёдида деярли ҳеч нарсаси билан қолмаган. Ҳеч ким у ерда уни жиддий қабул қилмасди ҳам. Унинг «Манчестер»даги асосий вазифаси Алексис Санчеснинг трансферига қўшилиши бўлган.
Шубҳасиз, Мхитарян ҳақиқатан ҳам Англияда ношуд ролини ўйнашни хоҳламаган ва кўплаб омади чопмаганлар қочадиган жой – Италия, аниқроғи, «Рома»га йўл олади.
«Мен футбол ўйнашни яхши кўраман, захира ўриндиғида вақтни беҳуда сарфламоқчи эмасман. Менга ишонишгани учун «Рома»га ўтдим», – деганди Мхитарян «Рома»га ўтгани ҳақида.
Римда Гейнрих ўз ўрнини топа олди ва 38 учрашувда 17 та гол урди. Бу тўрт йил ичида Англиядаги голларидан кўпроқ эди. 2020/21 йилги мавсумда ҳам у лига ассистентлар рўйхатида пешқадамлик қилмоқда.
Жером Боатенг
Жером Боатенг АПЛда шунчалик кам ўйнаганки, кўпчилик ҳатто унинг у ерда бўлганлигини ҳам эслолмайди.
«Манчестер Сити» таркибидаги атиги 16 ўйиндан сўнг Боатенг Венсан Компани ва Жолеон Лескотт билан курашишга қодирлигини исботлай олмайди ва кетишга қарор қилади. Аммо қандайдир ўртамиёна жамоага эмас, балки «Бавария»га.
Мюнхенликлар сафида эса Боатенг клуб афсонасига айланади ва 214 та учрашув ўтказди. Клуб даражасида Боатенг 20 та совринни қўлга киритди. Улар қаторига саккизта чемпионат ва иккита Чемпионлар Лигаси бош совринлари ҳам киради.
«Инглиз матбуоти янги мамлакатга кўникишимга умуман имкон бермади. Бу ерда улар дарҳол ўйнаб кетишингизни талаб қилади. Бу эса осон эмас», – деганди Боатенг 2016 йилда Англиядаги фаолияти ҳақида.
Мемфис Депай
«Манчестер Юнайтед» мухлислари Мемфис Депайнинг трансферини муваффақиятли деб тан олишни истамаганликларини тушуниш мумкин. Боиси у сарфланган 25 миллион фунт стерлингни оқлолмаганди. Нидерландиялик футболчи Манчестер клуби сафида 33 учрашув ўтказиб, атиги 2 та гол уради. Шу тариқа у жамоада ўз ўрнига бўла олмайди ва унга чиқиш эшиклари кўрсатилади.
Бироқ 2016 йилдан бери у «Лион» шарафини ҳимоя қилмоқда, у ерда эса уни керагидан ортиқ даражада қадрлашади, албатта, ҳақли равишда. У Франция чемпионатида 121 ўйинда 54 та гол урди. Агар жароҳат бўлмаганида Мемфис ўтган йилги Чемпионлар Лигаси ярим финал ўйинида («Бавария»га қарши) қатнашган бўлар эди. Ким билсин, балки у бўлганида ўйин француз жамоасининг фойдасига ҳал бўлган бўлармиди.
Ўз интервьюларида Депай ўзи хоҳлаган мақомда бўлиш имкониятини бергани учун «Лион»га миннатдорчилик билдиради.
Бир пайтлар «Юнайтед» қадрламаган нидерландиялик футболчи ҳозирда «Барселона»нинг асосий трансфер мақсади бўлиб турибди.
Бошқа интервью ва мақолалар:
Изоҳ (0)