O‘zbekiston tashqi ishlar vaziri Abdulaziz Komilov Markaziy Osiyo davlatlari bo‘ylab boshlagan safari doirasida Turkmaniston prezidenti Gurbanguli Berdimuhamedov bilan uchrashdi. Bu haqda vazirlik matbuot xizmati xabar bermoqda.
Ma’lum qilinishicha, 2021-yil 17-fevral kuni Ashxobod shahriga amaliy tashrif bilan kelgan O‘zbekiston tashqi ishlar vaziri Abdulaziz Komilov Turkmaniston prezidenti Gurbanguli Berdimuhamedov tomonidan qabul qilindi.
Vazir O‘zbekiston Prezidenti Shavkat Mirziyoyevning Turkmaniston prezidenti Gurbanguli Berdimuhamedovga maktubini topshirdi.
Uchrashuv chog‘ida oliy darajadagi tashriflar doirasida erishilgan kelishuvlarning ijrosi yuzasidan fikr almashildi.
Qayd etilishicha, ikki mamlakat yetakchilarining siyosiy irodasi natijasida davlatlararo munosabatlar sifat jihatidan yangi bosqichga ko‘tarildi. Siyosiy, savdo-iqtisodiy, investitsiyalar, transport-kommunikatsiya, madaniy-gumanitar va boshqa sohalardagi ikki tomonlama aloqalar salmoqli darajada faollashdi. Xalqaro va mintaqaviy tashkilotlar doirasida ham hamkorlik amalga oshirilmoqda.
Muloqotda Markaziy Osiyoda ko‘p tomonlama hamkorlikni rivojlantirish, yangi mintaqaviy bozorlarga chiqish uchun infratuzilmaviy va transport-kommunikatsiya loyihalarini amalga oshirish istiqbollariga alohida e’tibor qaratildi.
Muzokaralar chog‘ida tomonlarni qiziqtirgan boshqa masalalar ham muhokama qilindi.
Bundan avval Abdulaziz Komilov Islandiya elchisi bilan uchrashgani, Misrning yangi elchisini qabul qilgani hamda Moskvada bir qator xorijiy mamlakatlar elchilarining ishonch yorliqlarini qabul qilgani haqida xabar berilgandi.
Izoh (0)