Samarqandda elektr tarmoqlari korxonasidan tadbirkorlar foydasiga 400 mln so‘mdan ortiq mablag‘ undirib beriladi

Samarqandda elektr energiyasi ta’minotini ogohlantirishsiz o‘chirgan elektr tarmoqlari korxonasidan tadbirkorlar foydasiga 400 million so‘mdan ko‘proq mablag‘ undirib beriladi, deb xabar beradi Zarnews.

Samarqand shahar iqtisodiy sudining ma’lum qilishicha, Kattaqo‘rg‘on tumanidagi “Kattaqo‘rg‘on Valijon parranda” MChJ va “Murodulla Bobo” fermer xo‘jaliklari poliz ekinlarini yetishtirish maqsadida tijorat banklarining hisobiga Xitoydan texnologiya keltirib, issiqxona qurgan.

Issiqxonani yuritish uchun “Samarqand hududiy elektr tarmoqlari korxonasi” AJ bilan shartnomaviy munosabatga kirishib, intizomli to‘lovchi sifatida sarflangan elektr energiyasi haqini vaqtida to‘lab kelgan. Biroq 2020-yil 18-noyabrdan 19-noyabrga o‘tar kechasi 6 soat mobaynida hech qanday ogohlantirishsiz elektr energiyasi uzib qo‘yilgan. Oqibatda pomidor va bodring yetishtirilayotgan issiqxonada harorat pasayib, hosil muzlab qolgan va nobud bo‘lgan.

O‘sha kuni tadbirkorlarga yetkazilgan zarar miqdorini aniqlash maqsadida Kattaqo‘rg‘on tumani hokimining o‘rinbosari, jamiyatga xizmat ko‘rsatuvchi bank vakillari, Fermer, dehqon xo‘jaliklari va tomorqa yer egalari kengashi tuman bo‘limi raisi, tuman IIB boshlig‘i, qishloq xo‘jaligi bog‘dorchilik va issiqxona xo‘jaliklarini rivojlantirish bo‘yicha tuman vakili, tuman qishloq xo‘jaligi bo‘limi mutaxassisi hamda jamiyat vakillari ishtirokida dalolatnoma rasmiylashtirilgan.

Kattaqo‘rg‘on tumani prokuraturasi tomonidan tadbirkorlarning manfaatini ko‘zlab, elektr korxonasining aybi bilan yetkazilgan zararni undirish maqsadida Samarqand shahar iqtisodiy sudiga da’vo arizalari kiritilgan.

Avvalroq mazkur holatlar bo‘yicha tadbirkorlarga yetkazilgan zarar 1 milliard 54 million so‘mga baholangani to‘g‘risida xabar berilgandi.

Sud nizolarni qonun doirasida ko‘rib chiqib, javobgar “Samarqand hududiy elektr tarmoqlari korxonasi” AJdan “Kattaqo‘rg‘on Valijon parranda” MChJ foydasiga 88 million so‘m, “Murodulla Bobo” fermer xo‘jaligi foydasiga 332,5 million so‘m yetkazilgan zararni undirish haqida hal qiluv qarorlarini qabul qilgan.

“Hududiy elektr tarmoqlari”ning “Daryo”ga ma’lum qilishicha, sudning hal qiluv qarori ustidan apellyatsiya berilgan.

2020-yilning noyabrida “Hududiy elektr tarmoqlari” AJ “Kattaqo‘rg‘on Valijon parranda” MChJ hamda “Murodulla bobo” fermer xo‘jaligi borasidagi vaziyatga izoh berar ekan, ular elektr energiyasiga ulanishga doir hujjatlarga amal qilmagani sababli ekilgan pomidor va bodring ko‘chatlarining bir qismi zarar ko‘rganini bildirgan edi.

Shuningdek, o‘rganishlar davomida yuqoridagi fermer xo‘jaliklari bilan yonma-yon hududda joylashgan “Moralniy Invest” xususiy tadbirkor issiqxonasida ham, tabiiyki, elektr energiyasida uzilish bo‘lgani, biroq korxona rahbariyati tomonidan elektr energiyasiga ulanishga doir hujjatlar talablariga rioya qilingani sabab 4 gektar maydonga ekilgan pomidor ko‘chatlariga zarar yetmasdan, saqlab qolingani ta’kidlangandi.

Eslatib o‘tamiz, 2020-yilning noyabrida qashqadaryolik tadbirkor uch kun elektrsiz qolgani sabab olti mingta tovug‘idan ayrilgan edi.