Samarqand viloyatining Pastdarg‘om tumanida fuqaroga o‘zini tuman Ekologiya va atrof-muhitni muhofaza qilish bo‘limi boshlig‘i deb tanishtirgan shaxs undan 4 million so‘m pulni tovlamachilik yo‘li bilan olayotgan vaqtida ashyoviy dalillar bilan ushlangan. Bu haqda “Daryo”ga viloyat IIB axborot xizmati ma’lum qildi.
Ta’kidlanishicha, 2021-yilning 15-fevral kuni S. ismli fuqaro Samarqand viloyati IIBga ariza bilan murojaat qilib, Zarafshon magistral tizimidan foydalanish boshqarmasiga qarashli bir gektar yerida ekilgan 158 tup tol daraxtini kallaklash uchun ruxsatnoma so‘raganini, evaziga esa pul talab qilinganini bildirgan. Uning aytishicha, o‘zini Pastdarg‘om tumani Ekologiya va atrof-muhitni muhofaza qilish bo‘limi boshlig‘i deb tanishtirgan shaxs undan 4 million so‘m pul talab qilgan.
Mazkur arizaga asosan, 2021-yilning 15-fevral kuni viloyat IIB jinoyat qidiruv bo‘limi Korrupsiya va iqtisodiy jinoyatlarga qarshi kurashish bo‘limi hamda DXX Samarqand viloyati boshqarmasi xodimlari hamkorligida o‘tkazilgan tezkor tadbirda, o‘zini tuman Ekologiya atrof-muhitni muhofaza qilish bo‘limi boshlig‘i deb tanishtirgan ekologiya xodimi A. X. ariza muallifidan 4 million so‘m miqdoridagi pullarni olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) 3-qismi “v” bandi bilan jinoyat ishi qo‘zg‘atilgan.
Izoh (0)