Ўзбекистон ТИВ Россия ОТМларида таҳсил оладиган талабаларга огоҳлантириш билан чиқди.
Маълум қилинишича, Россия истеъмолчилар ҳуқуқлари ва инсон фаровонлиги ҳимояси соҳасида назоратни амалга ошириш Федерал хизмати сайтида янги коронавирус инфекцияси тарқалиши хавфи сақланиб қолаётган шароитда авиақатнов тикланган мамлакатлардан келаётган хорижий талабалар COVID-19’га ПЗР усули билан икки марта — Россияга кириб келишдан кўпи билан уч кун олдин ҳамда Россияга кириб келгандан сўнг 72 соат мобайнида тест топшириши ҳақида ахборот жойлаштирилган.
Аммо вазирлик матбуот хизматининг билдиришича, 2021 йил 16 февраль ҳолатига кўра, Россия томони Ўзбекистон фуқароларининг мамлакатга кириб келишлари, жумладан, ўқиш мақсадида келишлари учун ўрнатилган чекловларни бекор қилгани йўқ. Россия ҳукуматининг 2020 йил 16 мартдаги 635-р-сонли қарорида (2021 йил 3 февралдаги ўзгаришлар билан) кўрсатилган шахслар тоифалари бундан мустасно.
«Шу муносабат билан, элчихона Россия олий ўқув юртларида таълим оладиган Ўзбекистон фуқаролари ушбу мамлакатга киришга ҳуқуқи бўлган фуқаролар тоифасига кирмаслигини яна бир маротаба эслатиб ўтади», — дейилади ТИВ хабарида.
Эслатиб ўтамиз, Россия таълим ва илм-фан вазирининг буйруғи билан 8 февралдан бошлаб ушбу вазирлик ҳузуридаги олий ўқув юртларида кундузги ўқиш жараёни бошланди. 2020 йилнинг 13 ноябридан буён талабалар масофавий тарзда ўқиётганди.
Россияда ўқишнинг бошланиши ўзбекистонлик талабларнинг ушбу мамлакат ҳудудига кириши учун асос бўла олмаслиги ҳақида ТИВ аввал ҳам огоҳлантирганди.
Изоҳ (0)