Adliya vaziri yaqin kunlarda 2 mingta hukumat hujjati bekor qilinishini aytdi

Adliya vaziri ishtirokida 15-fevral, dushanba kuni o‘tkazilgan matbuot anjumanida Ruslanbek Davletov vazirlik idoraviy hujjatlar bo‘yicha 50 foizgacha hujjatlarni ro‘yxatdan o‘tkazmasdan qaytarib yuborayotganini ta’kidladi, deya xabar bermoqda “Daryo” muxbiri.

“Bilasizlar, qonun hujjatlarining ekspertiza yo‘nalishi juda ahamiyatga ega yo‘nalishlardan biri hisobalanadi. 2020-yilda 400 taga kamroq hujjat kelib tushdi. 2 ming 300 ta hujjat ekspertizaga kelgan bo‘lsa, har uchta hujjatdan bittasini, ya’ni 33 foizini Adliya vazirligi o‘tkazmayapti. Jamoatchilik juda katta e’tiroz bildiradi, muhokamalar paytida har xil masalalar tug‘iladi. O‘sha hujjat jamoatchilik muhokamasidan so‘ng vazirligimizga kelganidan keyin 33 foizini qaytarib yuboryapmiz. Bu juda yuqori foiz, deb o‘ylaymiz. Chunki biz sifat nuqtayi nazaridan ‘korzinka’ga ishlayapmiz. Bitta hujjat uchun katta resurs sarflanib, davlat organidagi amaldorlar va u yerdagi xodimlar vaqtini ketkazib ishlaydi, lekin uchta hujjatdan bittasi qaytib ketyapti.

Idoraviy hujjatlar bo‘yicha 50 foizgacha hujjatlarni ro‘yxatdan o‘tkazmasdan qaytarib yuboryapmiz. Biz tashkilotlarning o‘ziga tegishli qandaydir buyruqlar haqida emas, balki butun jamiyatimizga tegishli umummajburiy normalar to‘g‘risida gapiryapmiz. Shuning uchun aynan vazirliklarning qonun hujjatlari bo‘yicha ishini yaxshilashga alohida e’tibor qaratishimiz kerak va bu — biz uchun dolzarb masala”, — dedi u.

Davletovning aytishicha, qonunchilikda gilyotina, ya’ni kesib tashlash usulini qo‘llash boshlangan.

“Biz gilyotina, aniqrog‘i, kesib tashlash usulini qo‘llashni boshladik. Bugungi kunda qonun hujjatlarining bazasi juda yuqori. Chunki oxirgi 4—5 yilda mustaqillik davrida qabul qilingan qonun hujjatlarining 25 foizini qabul qildik. Hayotimizga juda katta massiv kirib keldi. Qonunlar ko‘p bo‘lsa, tadbirkorlar va fuqarolar tushunishi qiyin bo‘ladi.

Shuning uchun, gilyotinani qo‘llab, 500 ta Prezident hujjati birdaniga bekor bo‘ldi, 400 ta idoraviy hujjatni bekor qildik. Bu jarayon oson bo‘lmadi. Chunki vazirliklar o‘zini 1995-yilda qabul qilingan hujjatini ham kerak bo‘lib qolishi mumkin deya, bekor qilishga qarshilik ko‘rsatdi. O‘zimizning qiyin-qiyin suhbatlarimiz bo‘ldi, hozirgi vazirlik rahbarlari juda zamonaviy, ular o‘zgaryapti, buni ham tan olish kerak. Hozir yana 2 mingta hukumat hujjati bekor qilinishga tayyor turibdi. Bugun-erta imzolanishi kerak. Buning orqasidan butun qonunchilik massivimizni 10 foizgacha maqbullashtiramiz”, — dedi vazir.