Andijon viloyatining Asaka tumanida voyaga yetmagan farzandlari uchun to‘lanishi lozim bo‘lgan aliment pulini o‘z vaqtida to‘lamagan olti nafar ota 15 sutkaga qamaldi, deya xabar berdi “Daryo” muxbiri Umidjon Mamarasulov.
MIB viloyat boshqarmasi axborot xizmati xodimi Nurmuhammad G‘ofurovning ma’lum qilishicha, Asaka tumanida bo‘lib o‘tgan navbatdagi sud majlisida Ma’muriy javobgarlik to‘g‘risidagi kodeksning 47-4-moddasi (voyaga yetmagan yoki mehnatga layoqatsiz shaxslarni moddiy ta’minlashdan bo‘yin tovlash)ga asosan aliment to‘lashdan bo‘yin tovlab kelayotgan 6 nafar qarzdorning ma’muriy javobgarlik ishi ko‘rib chiqilgan.
Aniqlanishicha, Fuqarolik ishlari bo‘yicha Asaka tumanlararo sudining 2017-yil 17-martdagi ijro varaqasiga ko‘ra, qarzdor T.X.dan undiruvchi M.B. foydasiga ikki nafar voyaga yetmagan farzandining moddiy ta’minoti uchun oylik ish haqi va boshqa daromadlarining 1/3 qismi miqdorida aliment to‘lashi belgilangan.
MIB Asaka tuman bo‘limi xodimlari tomonidan ijro harakatlari davomida qarzdor bir necha marotaba og‘zaki va yozma ravishda ogohlantirilishiga qaramay, uch yildan ortiq muddat davomida 24 million 358 ming 336 so‘m aliment pulini to‘lamasdan bo‘yin tovlagan. Shu sababli byuroning Asaka tuman bo‘limi xodimlari tomonidan qarzdor T.X.ga nisbatan ma’muriy bayonnoma rasmiylashtirilib, jinoyat ishlari bo‘yicha Asaka tuman sudiga yuborilgan. Sud ishni ko‘rib chiqib, qarzdor T.X.ga nisbatan 15 sutka qamoq jazosi tayinlandi.
Shuningdek, sud majlisi davomida sudya tomonidan qarzdorlar F.S. (17,8 million so‘m), S.G‘. (8,9 million so‘m), B.M. (8,7 million so‘m), R.Q. (5,8 million so‘m), Z.J. (3,3 millilon so‘m)larga nisbatan alimentdan bo‘lgan qarzdorliklarini to‘lamaganliklari uchun har biriga 15 sutkadan ma’muriy qamoq jazosi tayinlangan.
Izoh (0)