Адлия вазири яқин кунларда 2 мингта ҳукумат ҳужжати бекор қилинишини айтди

Адлия вазири иштирокида 15 февраль, душанба куни ўтказилган матбуот анжуманида Русланбек Давлетов вазирлик идоравий ҳужжатлар бўйича 50 фоизгача ҳужжатларни рўйхатдан ўтказмасдан қайтариб юбораётганини таъкидлади, дея хабар бермоқда «Дарё» мухбири.

«Биласизлар, қонун ҳужжатларининг экспертиза йўналиши жуда аҳамиятга эга йўналишлардан бири ҳисобаланади. 2020 йилда 400 тага камроқ ҳужжат келиб тушди. 2 минг 300 та ҳужжат экспертизага келган бўлса, ҳар учта ҳужжатдан биттасини, яъни 33 фоизини Адлия вазирлиги ўтказмаяпти. Жамоатчилик жуда катта эътироз билдиради, муҳокамалар пайтида ҳар хил масалалар туғилади. Ўша ҳужжат жамоатчилик муҳокамасидан сўнг вазирлигимизга келганидан кейин 33 фоизини қайтариб юборяпмиз. Бу жуда юқори фоиз, деб ўйлаймиз. Чунки биз сифат нуқтаи назаридан ‘корзинка’а ишлаяпмиз. Битта ҳужжат учун катта ресурс сарфланиб, давлат органидаги амалдорлар ва у ердаги ходимлар вақтини кетказиб ишлайди, лекин учта ҳужжатдан биттаси қайтиб кетяпти.

Идоравий ҳужжатлар бўйича 50 фоизгача ҳужжатларни рўйхатдан ўтказмасдан қайтариб юборяпмиз. Биз ташкилотларнинг ўзига тегишли қандайдир буйруқлар ҳақида эмас, балки бутун жамиятимизга тегишли умуммажбурий нормалар тўғрисида гапиряпмиз. Шунинг учун айнан вазирликларнинг қонун ҳужжатлари бўйича ишини яхшилашга алоҳида эътибор қаратишимиз керак ва бу — биз учун долзарб масала», — деди у.

Давлетовнинг айтишича, қонунчиликда гильотина, яъни кесиб ташлаш усулини қўллаш бошланган.

«Биз гильотина, аниқроғи, кесиб ташлаш усулини қўллашни бошладик. Бугунги кунда қонун ҳужжатларининг базаси жуда юқори. Чунки охирги 4—5 йилда мустақиллик даврида қабул қилинган қонун ҳужжатларининг 25 фоизини қабул қилдик. Ҳаётимизга жуда катта массив кириб келди. Қонунлар кўп бўлса, тадбиркорлар ва фуқаролар тушуниши қийин бўлади.

Шунинг учун, гильотинани қўллаб, 500 та Президент ҳужжати бирданига бекор бўлди, 400 та идоравий ҳужжатни бекор қилдик. Бу жараён осон бўлмади. Чунки вазирликлар ўзини 1995 йилда қабул қилинган ҳужжатини ҳам керак бўлиб қолиши мумкин дея, бекор қилишга қаршилик кўрсатди. Ўзимизнинг қийин-қийин суҳбатларимиз бўлди, ҳозирги вазирлик раҳбарлари жуда замонавий, улар ўзгаряпти, буни ҳам тан олиш керак. Ҳозир яна 2 мингта ҳукумат ҳужжати бекор қилинишга тайёр турибди. Бугун-эрта имзоланиши керак. Бунинг орқасидан бутун қонунчилик массивимизни 10 фоизгача мақбуллаштирамиз», — деди вазир.