Кубада 12 февраль, жума куни ЭТЕКСА маҳаллий телекоммуникация компаниясининг алоқа марказида содир бўлган техник ҳодиса туфайли бутун мамлакат бўйлаб телефон алоқаси ва интернет узилиб қолди. Бу ҳақда «Интерфакс» хабар берди.
Мамлакат пойтахти Гавана ва бошқа учта вилоят аҳолисининг маълумот беришича, ҳодиса тушга яқин содир бўлган, узилишлар натижасида барча интернет ва алоқа хизматлари ишламай қолган. Халқаро алоқа хизматлари 90 дақиқада, интернет эса 10 дақиқада қайта тикланган.
ЭТЕКСА телекоммуникация компанияси «техник носозлик» сабаб келиб чиққан муаммо эндиликда бартараф этилгани ҳақида Twitter’да ёзган. Компания носозлик сабабини тушунтирмаган, аммо 2020 йилда мобил алоқа трафиги уч бараварга ошганини таъкидлаган.
Маълумот учун, Кубада 4,4 миллион киши мобил интернетдан фойдаланади. Бу мамлакат аҳолисининг тўртдан бир қисмига тенг.
Аввалроқ Кубада икки хил валюта тизими бекор қилингани ҳақида хабар берилганди. Мамлакатда маҳсулот ва хизматлар кескин қимматлашиши кутилмоқда. Республикада 1994 йилдан бери иккита валюта амал қилади — Куба песоси (CUP) ва Куба конвертация песоси (CUC). Иккинчи пул бирлиги Америка томонидан санкциялар жорий этилгач, мамлакатда айланмаси тўхтатилган АҚШ долларининг ўрнини босиши лозим эди.
Изоҳ (0)