Butun dunyoda koronavirusga qarshi emlanganlarning umumiy soni 159,3 milliondan oshdi. Bu haqda “TASS”ning hukumatlar, ekspertlar va OAV ma’lumotlariga asoslangan hisob-kitoblari guvohlik bermoqda.
Vaksina qabul qilganlar ulushi allaqachon dunyo aholisining 2 foizidan ko‘prog‘ini tashkil etmoqda. Hisob-kitoblar BMT Aholishunoslik jamg‘armasining 2020-yil o‘rtalaridagi dunyoda aholi soni 7 milliard 795 million kishini tashkil etishi haqidagi ma’lumotlariga nisbatan olingan.
So‘nggi yetti kun ichida kuniga o‘rtacha 6 millionga yaqin kishi emlandi. Shu bilan birga, 3-fevral kuni birinchi marta emlanganlar soni koronavirus bilan kasallanganlar sonidan oshib ketgandi.
Emlanganlarning aksariyati — 48 milliondan ortig‘i Qo‘shma Shtatlar aholisiga to‘g‘ri keladi. Ikkinchi o‘rinda Xitoy — 40 milliondan ortiq, uchinchi o‘rinda Buyuk Britaniyada 14,1 millionga yaqin odam emlandi. Emlanganlarning, taxminan, 65 foizi mazkur mamlakatlarga to‘g‘ri keladi. Shuningdek, Hindiston (7 million) va Isroilda (6,2 million) ham emlash kampaniyalari yuqori sur’atlar bilan davom etmoqda.
Shu bilan birga, aholisining eng katta ulushi emlangan davlatlar Isroil (69,3%), Birlashgan Arab Amirliklari (49,8%) va Seyshel orollari (49,7%) hisoblanadi. Buyuk Britaniyada jami aholining 21,1 foizdan ko‘prog‘i, AQShda esa 14 foizdan ortig‘i emlangan.
Rossiyada, “Sputnik V” vaksinasini ishlab chiqqan Gamaleya markazning ilmiy ishlar bo‘yicha direktor o‘rinbosari Denis Logunovning so‘zlariga ko‘ra, 2,2 millionga yaqin rossiyalik ushbu preparatning birinchi dozasini qabul qilgan.
O‘zbekistonda koronavirusga qarshi vaksinatsiya jarayoni fevral oyining oxiri, mart oyining boshida boshlanishi mumkin. Ayni paytda mamlakatda Xitoyning ZF 2001 vaksinasi sinovdan o‘tkazilmoqda va mazkur vaksina sinovlarida ikkinchi doza bilan emlanganlar 1000 nafardan oshdi.
Shuningdek, Rossiyaning “Sputnik V” vaksinasini O‘zbekistonda ishlab chiqarishni mahalliylashtirish rejasi ham mavjud. Rossiya hozircha O‘zbekiston mamlakatda “Sputnik V” vaksinasini ishlab chiqarish bilan shug‘ullanadigan kompaniyani tanlashini kutmoqda.
Izoh (0)