Shavkat Mirziyoyev 11-fevral kuni Samarqandning turizm salohiyatini, shu jumladan ziyorat turizmini rivojlantirishga doir taqdimot bilan tanishdi, deya xabar qilmoqda Prezident matbuot xizmati.
Ma’lum qilinishicha, 2021-yil 9-fevral kuni davlat rahbarining “O‘zbekistonda ichki va ziyorat turizmini yanada rivojlantirish chora-tadbirlari to‘g‘risida”gi farmoni qabul qilindi. Unda turizm mahsuloti va xizmatlarini diversifikatsiya qilish, transport yo‘nalishlarini kengaytirish hamda sifatini oshirish, sayyohlarga maqbul sharoitlar yaratish maqsadlari belgilandi.
Ta’kidlanishicha, bu borada Samarqandning salohiyati juda yuqori. Shu bois mazkur viloyatda turizm infratuzilmasini rivojlantirish bo‘yicha kompleks ishlar olib borilmoqda.
Xususan, Samarqand tumanida turistik markaz tashkil etilmoqda. Bu so‘lim maskanda 8 ta zamonaviy mehmonxona, yirik anjumanlar zali, restoranlar, bog‘ va sayilgohlar bo‘ladi.
Ushbu turistik markazni Samarqand xalqaro aeroporti, temiryo‘l vokzali, Imom Buxoriy maqbarasi, Registon maydoni va boshqa diqqatga sazovor joylar bilan bog‘laydigan ko‘chalar ta’mirlanmoqda.
Samarqand shahrining turizm salohiyatini rivojlantirish maqsadida 10 ta yangi mehmonxona barpo etilmoqda.
Davlat rahbari taqdimot bilan tanishib, transport, yo‘l va kommunikatsiya tarmoqlarini rivojlantirish, Samarqand shahrini obodonlashtirish, savdo va xizmatlarni kengaytirish bo‘yicha topshiriqlar berdi.
Bundan avval Shavkat Mirziyoyev viloyat rahbarlariga 2021-yilda 1,6 milliondan ortiq ish o‘rni yaratish bo‘yicha topshiriq bergani, hafta o‘rtasida birorta vazirni Toshkentda ko‘rsa, ishdan olishini ta’kidlagani hamda davlat aktivlarini xususiylashtirishni tezlashtirish bo‘yicha topshiriq bergani haqida xabar berilgandi.
Izoh (0)