Qashqadaryo viloyatining Dehqonobod tumanida 60 tup Zarafshon archasi, 84 tup archa va 1 tup uchqot daraxti kesilishiga yo‘l qo‘yib bergan o‘rmon begi va qo‘riqchisi salkam 194 million so‘m jarima to‘lashi mumkin. Bu haqda Dehqonobod tuman hokimligi axborot xizmati ma’lum qildi.
Hokimlik axborot xizmati bilan suhbatlashgan tuman Ekologiya va atrof-muhitni muhofaza qilish sohasidagi nazorat inspeksiyasi boshlig‘i O‘ktam Jo‘lliyev bu haqda tuman prokuraturasiga hujjatlar taqdim etilib, aybdorlarga chora ko‘rilishida ko‘mak so‘ralganini ma’lum qilgan.
“Xodimlarimiz tomonidan holat o‘rganilganda Dehqonobod davlat o‘rmon xo‘jaligi Oqbosh o‘rmon bo‘limining Jangalsoy va Qorong‘iqo‘l massivlaridagi tabiiy holda o‘sgan 60 tup Zarafshon archasi tag qismidan kesilib, o‘sishdan to‘xtash darajasiga yetkazilgani, shuningdek, 84 tup archa va 1 tup uchqot esa o‘sishda davom etishi mumkin bo‘lgan darajada kesilgani ma’lum bo‘ldi”, — deydi tuman Ekologiya va atrof-muhitni muhofaza qilish sohasidagi nazorat inspeksiyasi boshlig‘i O‘ktam Jo‘lliyev.
Ta’kidlanishicha, holat ekologiya xodimlari tomonidan aniqlangach yetkazilgan zarar 193 million 341 ming so‘mni tashkil qilishi oydinlashgan.
“Bu haqda tuman prokuraturasiga hujjatlar taqdim etilib, kesilgan daraxtlar surati ham berilgan va mazkur holatga yo‘l qo‘yib bergan Oqbosh o‘rmon bo‘limi o‘rmon begi E.G‘. va o‘rmon qo‘riqchisi B.B.dan yetkazilgan zararni undirishda ko‘mak so‘raldi”, — deydi O‘ktam Jo‘lliyev.
Izoh (0)