Britaniyaning Expanscape kompaniyasi 7 ta ekranga ega Aurora 7’ning (noutbuk) prototipini namoyish etdi, deb xabar beradi “Korrespondent.net”.
Hozircha Aurora 7 prototip bo‘lgani sabab, uning korpusi 3D-printerda chop etilgan.
Noutbuk Intel i9 9900K protsessori, 64 gigabaytli tezkor DDR4 xotira va NVIDIA GTX 1060 videokarta, shuningdek, 2 terabayt ichki va qo‘shimcha, 2,5 terabayt SSD xotira bilan jihozlangan.
Mozayka ko‘rinishida yig‘iladigan ekranlar qatoridan 4K sifatni qo‘llab-quvvatlaydigan (piksellari 3840 x 2160) to‘rtta 17,3 dyuymli suyuq-kristall displey, shuningdek, piksellari nisbati 1920 x 1200 bo‘lgan 7 dyuymdan kichikroq uchta ekran o‘rin olgan. Ekranlardan biri bilak sohasida, tachpad yonida joylashgan.
Shu bilan birga, butun tizim bitta konstruksiya sifatida yig‘ilib, sumkaga joylanadi va uni ko‘tarib qahva ichgani borish mumkin.
Ta’kidlanishicha, noutbuk og‘irligi 12 kilogrammni tashkil etadi. Bundan tashqari, u katta miqdorda elektr energiyasini talab qiladi.
Expanscape kompaniyasi Aurora 7’ning narxini ma’lum qilmagan, shu bilan birga ular xaridorlarga narxni oshkor etmaslik bo‘yicha hujjatlarni imzolashni talab qiladi.
Izoh (0)