Британия компанияси еттита экранга эга ноутбук прототипини намойиш этди

Британиянинг Expanscape компанияси 7 та экранга эга Aurora 7’нинг (ноутбук) прототипини намойиш этди, деб хабар беради «Korrespondent.net».

Ҳозирча Aurora 7 прототип бўлгани сабаб, унинг корпуси 3D-принтерда чоп этилган.

Ноутбук Intel i9 9900К процессори, 64 гигабайтли тезкор DDR4 хотира ва NVIDIA GТХ 1060 видеокарта, шунингдек, 2 терабайт ички ва қўшимча, 2,5 терабайт SSD хотира билан жиҳозланган.

Мозайка кўринишида йиғиладиган экранлар қаторидан 4К сифатни қўллаб-қувватлайдиган (пикселлари 3840 х 2160) тўртта 17,3 дюймли суюқ-кристалл дисплей, шунингдек, пикселлари нисбати 1920 х 1200 бўлган 7 дюймдан кичикроқ учта экран ўрин олган. Экранлардан бири билак соҳасида, тачпад ёнида жойлашган.

Шу билан бирга, бутун тизим битта конструкция сифатида йиғилиб, сумкага жойланади ва уни кўтариб қаҳва ичгани бориш мумкин.

Таъкидланишича, ноутбук оғирлиги 12 килограммни ташкил этади. Бундан ташқари, у катта миқдорда электр энергиясини талаб қилади.

Expanscape компанияси Aurora 7’нинг нархини маълум қилмаган, шу билан бирга улар харидорларга нархни ошкор этмаслик бўйича ҳужжатларни имзолашни талаб қилади.