Telegram messenjeri yanvar oyida dunyoda eng ko‘p yuklab olingan mobil dasturga aylandi. Bu haqda platforma asoschisi Pavel Durov ma’lum qildi, deb yozadi Meduza.
Durov messenjerning auditoriyasi qay darajada o‘sganiga aniqlik kiritmadi. Yanvar o‘rtalarida u Telegram’ning faol foydalanuvchilari soni 500 milliondan oshganini ma’lum qilgandi.
Telegram messenjeri auditoriyasi AQSh sobiq prezidenti Donald Tramp tarafdorlari o‘rtasida ommabop bo‘lgan Parler ijtimoiy tarmog‘i Kapitoliyga hujumdan keyin yanvar oyida Apple va Google tomonidan dasturlar do‘konidan o‘chirib tashlanganidan keyin o‘sdi.
Telegram foydalanuvchilari ko‘payishiga WhatsApp messenjerining maxfiylik siyosatidagi o‘zgarishlar ham sabab bo‘lgan bo‘lishi mumkin. Bunday xatti-harakatlar ortidan Signal messenjerining auditoriyasi ham o‘sdi.
Eslatib o‘tamiz, yanvarda Amerikaning Coalition for a Safer Web (Xavfsiz internet koalitsiyasi) notijorat tashkiloti Apple va Google kompaniyalaridan Telegram messenjerini dasturlar do‘konidan o‘chirib tashlashni talab qilgan. Uning iddao qilishicha, Telegram ekstremizm va antisemitizmni tarqatishga imkoniyat yaratadi, shuningdek, irqiy asosda tahdidlar yuborish va zo‘ravonlikni muvofiqlashtirish uchun foydalaniladi.
Telegram asoschisi Pavel Durov sud da’vosini to‘g‘ridan to‘g‘ri izohlamadi, ammo bir hafta ichida messenjer administratorlari AQShda zo‘ravonlikka qaratilgan yuzlab da’vatlarni bloklab qo‘yganini ma’lum qildi.
Izoh (0)