Apple insonning barcha barmoqlari va qo‘li harakatini kuzatishga qodir “aqlli” magnit qo‘lqoplarni o‘ylab topdi, deb xabar beradi Hi-Tech.Mail.ru.
Apple anchadan buyon qo‘shimcha reallik ishlari uchun “aqlli” ko‘zoynak yoki shlemlar ustida ish olib borayotgani ma’lum. Faqat ushbu qurilmalar haqida ma’lumotlar juda kam. Kompaniyaning patentida paydo bo‘lgan yangi tafsilotlarda qo‘l harakatini kuzatishga qodir maxsus qo‘lqoplar haqida so‘z boradi — ular virtual obyektlar va ko‘zoynaklar interfeysini boshqarishga yordam beradi.
Ushbu qo‘lqoplarga maxsus magnit datchiklar o‘rnatilgan bo‘lib, ular qo‘l va barmoqlarning makondagi holatini aniqlaydi. Buning uchun qo‘lqoplarga magnit maydon hosil qiladigan ikkita modul o‘rnatiladi, barmoq uchlarida esa maxsus datchiklar paydo bo‘ladi — tizim faqat ushbu datchiklarning magnit maydon manbasiga nisbatan o‘zgarishini hisoblaydi, xolos.
Virtual reallikda zamonaviy manipulyatorlar ham alohida barmoqlar harakatini kuzata oladi, biroq u qadar aniq va barcha yuzalarda emas — shu bilan birga, tutqichlarni ushlab turish kerak bo‘ladi. Bu kabi qo‘lqoplar esa harakatni ancha erkinlashtiradi.
Apple muntazam qo‘shimcha reallikda ishlashda qulaylik tug‘dirishda kerak bo‘ladigan qurilmalarni sinovdan o‘tkazmoqda. Qo‘lqoplardan tashqari, Apple’ning havodagi qo‘l harakatlari orqali qurilmani boshqarishda kerak bo‘ladigan “aqlli” uzukka patenti bor.
Izoh (0)