Ikkita USB 4 porti, juda kuchli protsessor va grafika. Apple M1 platformasidagi MacBook Pro 13 taqdim etildi
MacBook Pro 13 Apple’ning mutlaqo yangi 5-nanometrli bir kristalli M1 platformasi yaratilgan ikkinchi noutbugiga aylandi, deb xabar beradi IXBT.
Ma’lum qilinishicha, CPU’ning ishlash samaradorligi 2,8 barobarga, grafik protsessorning samaradorligi esa 5 baravarga oshgan. Apple’dagilarning ta’kidlashicha, yangi MacBook Pro 13 eng mashhur Windows noutbuklardan ham uch barobar tezroq ishlaydi.
M1’ga ega yangi MacBook Air’da passiv sovitish tizimidan foydalanilgan va u mutlaqo shovqinsiz ishlasa, MacBook Pro 13 aktiv element — ventilyatordan foydalangan. Umuman olganda, ushbu modelning ishlash samaradorligi MacBook Air’nikidan yuqori.
Agarda MacBook Air bir marta quvvatlanish bilan eng uzoq ishlaydigan Air’ga aylangan bo‘lsa, yangi MacBook Pro 13 — Apple tarixidagi eng uzoq ishlaydigan noutbuk bo‘ldi. Uning avtonomligi 20 soatga yetadi. Tezkor xotirasi 6 yoki 16 gigabayt, SSD hajmi — 256/512 gigabayt yoki 1/2 terabayt.
Ranglar gammasiga o‘zgartirish kiritilmagan. Bazaviy versiya narxi 1300 dollar. Yangilangan MacBook Pro 13’ni AQShda 10-noyabrdan boshlab buyurtma qilish mumkin, savdolar keyingi haftadan boshlanadi.
Eslatib o‘tamiz, Apple’ning 15-sentabrdagi taqdimotida Watch SE hamyonbop “aqlli” soati hamda iPad planshetlari, 13-oktabrda esa to‘rtta iPhone 12 smartfoni taqdim etilgandi.
