Xitoyda o‘tgan kun davomida mamlakat ichida koronavirus infeksiyasiga chalinish bo‘yicha yangi holat aniqlanmadi, Shanxay va Guandun viloyatiga chet eldan kelgan ikki kishida kasallik qayd etildi. Bu haqda Xitoy Xalq Respublikasi Sog‘liqni saqlash davlat qo‘mitasi Oy taqvim bo‘yicha yilning so‘nggi kunida ma’lum qildi, deb yozmoqda “Interfaks”.
Ikki oy oldin Xitoyning bir qator viloyatlarda kasallik avj olganidan so‘ng qabul qilingan qat’iy cheklovlar tufayli hukumat infeksiyaning mamlakat ichida keng tarqalishining oldini olishga muvaffaq bo‘ldi.
Kasallikning yoyilishi 2021-yilning 12-fevralida nishonlanadigan “Bahor bayrami”— Oq taqvim bo‘yicha Yangi yil arafasiga to‘g‘ri kelgani kuchli xavotir uyg‘otgandi. Mazkur bayram Xitoyda eng e’tiborga sazovor bayramlardan biri hisoblanadi. An’anaga ko‘ra, butun mamlakat bo‘ylab “katta” oilalarning barcha a’zolari bir joyga to‘planadi. Bu aholining ommaviy migratsiyasiga va natijada katta yig‘inlar hosil bo‘lishiga olib keladi.
Bundan tashqari, bayramda ommaviy sayillar va ziyofatlar, shahar parklarida karnavallar o‘tkaziladi, bu esa o‘z navbatida virus tarqalishining kuchayishiga olib kelishi mumkin.
Koronavirusga qo‘shimcha ravishda Xitoy shaharlarida havoning keskin ifloslanishi yuzaga keladi, bu asosan bayramning ajralmas qismi bo‘lgan ko‘plab mushakbozlik tadbirlari bilan bog‘liq, deya ogohlantirdi, XXR Ekologiya va atrof-muhit vazirligi.
Avvalroq Xitoyning ayrim shaharlarida aholining Yangi yil bayramini uyda o‘tkazishi uchun pul to‘lash boshlangani haqida xabar berilgandi. Aholiga bayramni uyda o‘tkazish uchun ming Xitoy yuani (155 dollar) taklif qilingan.
Izoh (0)