Si Szinpin AQSh va Xitoy o‘rtasidagi ziddiyatni butun dunyo uchun halokat deb atadi

AQSh va Xitoy o‘rtasidagi nizo butun dunyo uchun halokat bo‘lgan bo‘lardi, shuning uchun ikki mamlakat muzokaralarni qayta boshlashi kerak. Bu haqda Xitoy Xalq Respublikasi raisi Si Szinpin Amerika prezidenti Jo Bayden bilan telefon suhbati chog‘ida aytib o‘tdi, deb yozadi “RBK”.

“Hamkorlik — ikkala xalq uchun yagona to‘g‘ri tanlov. Hamkorlik bizning mamlakatlarimizga va butun dunyoga katta natijalarga erishishda yordam beradi, ziddiyat esa halokatga aylanishi aniq”, — dedi Si Szinpin.

Uning ta’kidlashicha, Vashington va Pekinning ko‘p masalalar bo‘yicha fikrlari har xil, lekin tomonlar bir-biriga hurmat bilan munosabatda bo‘lib qolishi va murosaga kelishga harakat qilishi kerak. Kelishmovchilik keltirib chiqarayotgan mavzular sifatida u Tayvan va Gonkong masalalarini keltirib o‘tdi. Si Szinpin qayd etishicha, AQSh Xitoy suvereniteti bilan bog‘liq masalalarga ehtiyotkorlik bilan yondashishi kerak.

“Tayvan, Gonkong va Shinjon masalalari Xitoyning ichki ishlari hisoblanadi hamda uning suvereniteti va hududiy yaxlitligiga doirdir. AQSh bizning mamlakat manfaatlarini hurmat qilishi kerak”, — deya ta’kidladi Xitoy raisi.

Avvalroq AQSh prezidenti Jozef Bayden Xitoy Xalq Respublikasi raisi Si Szinpin bilan birinchi marta telefon orqali muloqot qilgani, muzokaralar chog‘ida Bayden Pekinning xatti-harakatlaridan xavotirda ekanligini bildirgani, xususan, u Gonkong, Shinjon va Tayvandagi vaziyatlarni tilga olgani xabar berilgan edi. Bundan tashqari, Amerika yetakchisi amerikaliklarning xavfsizligi, farovonligi, salomatligi va hayot tarzini himoya qilishga tayyor ekanligini aytib, o‘zining birlamchi yo‘nalishlaridan biri sifatida erkin va ochiq Hind-Tinch okeani mintaqasini ko‘rsatib o‘tdi.

AQSh va Xitoy o‘rtasidagi munosabatlar Donald Trampning prezidentligi davrida yomonlashdi. 2017-yildan boshlab AQSh Pekinga va Xitoy kompaniyalariga qarshi bir qator sanksiyalar kiritdi. AQShga olib kiriladigan Xitoy tovarlari uchun oshirilgan boj to‘lovlari joriy qilindi, Pekin ham xuddi shunday chora bilan javob qildi. O‘tgan yil yanvarida tomonlar Xitoyning AQShdan sotib olinadigan mahsulotlar hajmini oshirishi, Vashington esa bir qator Xitoy mahsulotlariga boj kiritishni kechiktirishi haqida kelishib oldi. Bundan tashqari, Vashington Pekin va Xitoy kompaniyalarini ko‘p marta Amerika texnologiyalarini o‘g‘irlaganlikda ayblagan. Xitoyning ko‘plab texnologik gigantlari “qora ro‘yxa”larga kiritilgan.