Turkmanistonda 2024-yilgacha mamlakatdagi oliy ta’lim muassasalarini xalqaro darajadagi obro‘li oliygohlar ro‘yxatlariga kiritish uchun maxsus komissiya tuzildi. Bu haqda “Turkmen.news” xabar qilgan.
Komissiya amalga oshirish kerak bo‘ladigan chora-tadbirlar rejasini ham tasdiqlagan. Bunda OTMlarni xalqaro akkreditatsiyadan o‘tkazish, talabalar, professor va o‘qituvchilarning tarkibida ilmiy faoliyatni tashkil qilish, shuningdek, jahon tajribasi asosida va milliy qadriyat hamda an’analarga tayangan holda innovatsion uslublarni faoliyatga jalb qilishga e’tibor qaratiladi.
Qayd etilishicha, Turkmaniston Yevroittifoq tomonidan tashkillashtirilayotgan “Erazmus+” xalqaro almashinuv dasturiga kiritilgan. Dastur doirasida turkman OTMlarining talaba va o‘qituvchilari hamkor mamlakatlardagi seminarlarda ishtirok etadi va mahalliy o‘quv dargohlariga tashrif buyuradi.
Turkmaniston davlat agentligining 8-fevraldagi xabarida Gurbanguli Berdimuhamedovning talabalarni xalqaro olimpiadalarda ishtirokini ta’minlash zarurligini qayd etgani, shuningdek oliy ta’lim muassasalarida xalqaro maydonda obro‘ga ega xorij universitetlari, institutlari bilan qo‘shma simpoziumlar, ilmiy-amaliy anjumanlar, ko‘rgazma va tanlovlar o‘tkazish kerakligini ta’kidlagani ma’lum qilingandi.
Avval Turkmaniston prezidentining mamlakatdagi teatrlarda “xalqning baxtli hayoti” to‘g‘risidagi spektakllar yo‘qligi sabab madaniyat vaziriga hayfsan bergani, ikkinchi sun’iy yo‘ldoshni uchirishni va yuk samolyotlarini sotib olishni buyurgani xabar qilingandi.
Izoh (0)