Туркманистонда 2024 йилгача мамлакатдаги олий таълим муассасаларини халқаро даражадаги обрўли олийгоҳлар рўйхатларига киритиш учун махсус комиссия тузилди. Бу ҳақда «Turkmen.news» хабар қилган.
Комиссия амалга ошириш керак бўладиган чора-тадбирлар режасини ҳам тасдиқлаган. Бунда ОТМларни халқаро аккредитациядан ўтказиш, талабалар, профессор ва ўқитувчиларнинг таркибида илмий фаолиятни ташкил қилиш, шунингдек, жаҳон тажрибаси асосида ва миллий қадрият ҳамда анъаналарга таянган ҳолда инновацион услубларни фаолиятга жалб қилишга эътибор қаратилади.
Қайд этилишича, Туркманистон Евроиттифоқ томонидан ташкиллаштирилаётган «Эразмус+» халқаро алмашинув дастурига киритилган. Дастур доирасида туркман ОТМларининг талаба ва ўқитувчилари ҳамкор мамлакатлардаги семинарларда иштирок этади ва маҳаллий ўқув даргоҳларига ташриф буюради.
Туркманистон давлат агентлигининг 8 февралдаги хабарида Гурбангули Бердимуҳамедовнинг талабаларни халқаро олимпиадаларда иштирокини таъминлаш зарурлигини қайд этгани, шунингдек олий таълим муассасаларида халқаро майдонда обрўга эга хориж университетлари, институтлари билан қўшма симпозиумлар, илмий-амалий анжуманлар, кўргазма ва танловлар ўтказиш кераклигини таъкидлагани маълум қилинганди.
Аввал Туркманистон президентининг мамлакатдаги театрларда «халқнинг бахтли ҳаёти» тўғрисидаги спектакллар йўқлиги сабаб маданият вазирига ҳайфсан бергани, иккинчи сунъий йўлдошни учиришни ва юк самолётларини сотиб олишни буюргани хабар қилинганди.
Изоҳ (0)