Kapurlar sulolasining vakili – aktyor Rajiv Kapur 2021-yilning 9-fevral kuni 58 yoshida yurak xurujidan vafot etdi. Quyida marhum aktyorning hayoti va ijodi borasidagi bir qancha qiziqarli ma’lumotlar bilan tanishish mumkin.
Bollivuddagi debyut
Rajiv Kapur o‘zining Bollivuddagi debyutini 1983-yil Mexraning “Biz bir qalbmiz” filmidan boshlagan. Ushbu filmda Rajivning amakisi – aktyor Shammi Kapur hamda Tanuja ham ishtirok etgan.
Rajiv Kapur − Chimpu
Kapurlar oilasida laqab qo‘yish an’anasi mavjud. Randxir Kapur − Dabu, Rishi Kapur − Chintu, Rajiv esa Chimpu laqabini olgan.
Ijodiy faoliyat
Rajiv Kapur “Jannat”, “Ganga, suving loyqalangan”, “Zabardast”, “Priti”, “Zilzila”, “Hammasi uchun tashakkur”, “Olov daryo” va “Har kimning burchi” kabi filmlarda suratga tushgan.
Rajiv Kapur − rejissor
Rajiv Kapur o‘zining birinchi rejissorligini “Sevgi kitobi” filmi bilan boshlagan, unda Rishi Kapur va Madxuri Dikshit bosh rollarni ijro etgan. Afsuski, film muvaffaqiyatga erishmagan.
Rajiv Kapur − prodyuser
Rajiv nafaqat aktyor, rejissor, balki bir necha filmlarga prodyuserlik ham qilgan. Masalan, “Xina”, “Sevgi kitobi”, “Uyga qaytaylik” kabilar. So‘nggi ikki loyihaning muharriri ham bo‘lgan.
Shaxsiy hayot
Aktyorlik faoliyatining boshlarida Rajiv Kapur o‘zi ishtirok etgan film – “Ganga, suving loyqalangan” filmidagi partnyori Divya Rana bilan uchrashgan. Keyinchalik Mina Kanvar, Nagma va Madxuri Dikshit bilan ham yaqin munosabatda bo‘lgan. 2001-yilda aktyor arxitektor Arti Sabxarval bilan turmush qurgan, afsuski, bir necha yildan so‘ng ularning nikohi buzilgan.
Bollivudga qaytish
Rajiv Kapur taniqli rejissor Ashutosh Govarikerning “Toolsidas Junior” filmi orqali yana Bollivud kinosiga qaytishga tayyor edi. Loyihaning namoyishi 2021-yilga mo‘ljallangan bo‘lib, unda asosiy rollardan birini Sanjay Datt ijro etgan. Afsuski, Rajiv Kapurga o‘zining ishtirokidagi so‘nggi filmni ko‘rish nasib etmadi.
Izoh (0)