Капурлар сулоласининг вакили – актёр Ражив Капур 2021 йилнинг 9 февраль куни 58 ёшида юрак хуружидан вафот этди. Қуйида марҳум актёрнинг ҳаёти ва ижоди борасидаги бир қанча қизиқарли маълумотлар билан танишиш мумкин.
Болливуддаги дебют
Ражив Капур ўзининг Болливуддаги дебютини 1983 йил Мехранинг «Биз бир қалбмиз» фильмидан бошлаган. Ушбу фильмда Раживнинг амакиси – актёр Шамми Капур ҳамда Танужа ҳам иштирок этган.
Ражив Капур − Чимпу
Капурлар оиласида лақаб қўйиш анъанаси мавжуд. Рандхир Капур − Дабу, Риши Капур − Чинту, Ражив эса Чимпу лақабини олган.
Ижодий фаолият
Ражив Капур «Жаннат», «Ганга, сувинг лойқаланган», «Забардаст», «Прити», «Зилзила», «Ҳаммаси учун ташаккур», «Олов дарё» ва «Ҳар кимнинг бурчи» каби фильмларда суратга тушган.
Ражив Капур − режиссёр
Ражив Капур ўзининг биринчи режиссёрлигини «Севги китоби» фильми билан бошлаган, унда Риши Капур ва Мадхури Дикшит бош ролларни ижро этган. Афсуски, фильм муваффақиятга эришмаган.
Ражив Капур − продюсер
Ражив нафақат актёр, режиссёр, балки бир неча фильмларга продюсерлик ҳам қилган. Масалан, «Хина», «Севги китоби», «Уйга қайтайлик» кабилар. Сўнгги икки лойиҳанинг муҳаррири ҳам бўлган.
Шахсий ҳаёт
Актёрлик фаолиятининг бошларида Ражив Капур ўзи иштирок этган фильм – «Ганга, сувинг лойқаланган» фильмидаги партнёри Дивя Рана билан учрашган. Кейинчалик Мина Канвар, Нагма ва Мадхури Дикшит билан ҳам яқин муносабатда бўлган. 2001 йилда актёр архитектор Арти Сабхарвал билан турмуш қурган, афсуски, бир неча йилдан сўнг уларнинг никоҳи бузилган.
Болливудга қайтиш
Ражив Капур таниқли режиссёр Ашутош Говарикернинг «Toolsidas Junior» фильми орқали яна Болливуд киносига қайтишга тайёр эди. Лойиҳанинг намойиши 2021 йилга мўлжалланган бўлиб, унда асосий роллардан бирини Санжай Датт ижро этган. Афсуски, Ражив Капурга ўзининг иштирокидаги сўнгги фильмни кўриш насиб этмади.
Изоҳ (0)