Тошкент вилоятининг Бўка туманида 8 ёшли қизни Spark уриб кетгани, машина рулида ИИБ ходими бўлгани айтилгани ҳақида хабар берилган эди. Қизалоқ шифохонада эканлиги, аммо ЙТҲ содир этган ҳайдовчи унинг ҳолидан хабар олмаётгани ҳақида видео тарқалиб, кенг муҳокамаларга сабаб бўлгач, ИИББ мабуот хизмати расмий муносабат билдирди.
Қайд этилишича, 10 февраль куни Тошкент вилояти ИИББ масъул раҳбарлари шифохонада даволанаётган 8 ёшли Д.Ш.нинг ҳолидан хабар олиш ва вазиятга тўлиқ ойдинлик киритиш мақсадида Бўка тумани марказий шифохонасида бўлди.
«У ерда қизнинг ота-онаси ва масъул шифокорлар билан учрашиб, вазият шахсан ўрганилди, қизалоқнинг ўзи билан ҳам суҳбат қилинди. Унинг ота-онасига бу ҳолатда биринчи навбатда боланинг саломатлиги муҳимлиги, бунинг учун барча зарурий чоралар кўрилиши, шунингдек, ЙТҲ иштирокчисига ҳам қонуний чора кўриш таъминланиши тушунтирилди», — дейилади ИИББ муносабатида.
Хабарда айтилишича, ҳозирда раҳбарият назоратида ҳодиса иштирокчилари томонидан ҳар қандай моддий ва маънавий зарарни қоплаш чоралари кўрилмоқда.
Беморни қабул қилган шифокор қиз ўз вақтида шифохонага етказилгани ва биринчи ёрдам вақтида кўрсатилганини айтиб, унинг ҳозирги ҳолати яхши эканлиги, барча беморлар каби муолажа хонасида даволанишга ўтганлигини маълум қилган.
ИИББ эълон қилган расмий баёнотда ЙТҲ содир этган ҳайдовчининг Ички ишлар идорасига алоқаси бор-йўқлиги ҳақида ҳеч қандай маълумот келтирилмаган.
Изоҳ (0)