Apple «ақлли» магнит қўлқопларни ўйлаб топди

Apple инсоннинг барча бармоқлари ва қўли ҳаракатини кузатишга қодир «ақлли» магнит қўлқопларни ўйлаб топди, деб хабар беради Hi-Tech.Mail.ru.

Apple анчадан буён қўшимча реаллик ишлари учун «ақлли» кўзойнак ёки шлемлар устида иш олиб бораётгани маълум. Фақат ушбу қурилмалар ҳақида маълумотлар жуда кам. Компаниянинг патентида пайдо бўлган янги тафсилотларда қўл ҳаракатини кузатишга қодир махсус қўлқоплар ҳақида сўз боради — улар виртуал объектлар ва кўзойнаклар интерфейсини бошқаришга ёрдам беради.

Ушбу қўлқопларга махсус магнит датчиклар ўрнатилган бўлиб, улар қўл ва бармоқларнинг макондаги ҳолатини аниқлайди. Бунинг учун қўлқопларга магнит майдон ҳосил қиладиган иккита модуль ўрнатилади, бармоқ учларида эса махсус датчиклар пайдо бўлади — тизим фақат ушбу датчикларнинг магнит майдон манбасига нисбатан ўзгаришини ҳисоблайди, холос.

Виртуал реалликда замонавий манипуляторлар ҳам алоҳида бармоқлар ҳаракатини кузата олади, бироқ у қадар аниқ ва барча юзаларда эмас — шу билан бирга, тутқичларни ушлаб туриш керак бўлади. Бу каби қўлқоплар эса ҳаракатни анча эркинлаштиради.

Apple мунтазам қўшимча реалликда ишлашда қулайлик туғдиришда керак бўладиган қурилмаларни синовдан ўтказмоқда. Қўлқоплардан ташқари, Apple’нинг ҳаводаги қўл ҳаракатлари орқали қурилмани бошқаришда керак бўладиган «ақлли» узукка патенти бор.