Pokistonda Rossiyaning “Sputnik V” koronavirusga qarshi vaksinasini ro‘yxatdan o‘tkazdi. Bu haqda Rossiya to‘g‘ridan to‘g‘ri investitsiya jamg‘armasi (RDIF) ma’lumotiga tayanib “Interfaks” xabar berdi.
“RDIF Pokistonning dori-darmonni nazorat qilish boshqarmasi (DRAP — Drug Regulatory Authority of Pakistan) tomonidan koronavirusga qarshi “Sputnik V” vaksinasi tasdiqlanganligini e’lon qiladi”, — deyiladi xabarda.
Xabarda, shuningdek, Pokiston “Sputnik V” vaksinasini tasdiqlagan dunyodagi 22-davlatga aylangani ma’lum qilindi. Rossiyada o‘tkazilgan “Sputnik V” klinik sinovlari ma’lumotlari asosida vaksina Pokistonda favqulodda foydalanish uchun ruxsat berish doirasida ro‘yxatdan o‘tkazilgan.
RDIF rahbari Kirill Dmitriyev Pokiston dunyodagi eng ko‘p aholiga ega davlatlardan biri ekani va uning “Sputnik V” vaksinasini koronavirusga qarshi dori-darmon milliy portfeliga kiritishi insoniyat sog‘lig‘ini himoya qilishda muhim qadam bo‘lganini ta’kidladi.
Avvalroq Vengriyada “Sputnik V” vaksinasi foydalanish uchun ma’qullangan edi. Unga ko‘ra, Milliy sog‘liqni saqlash markazi “Sputnik V” vaksinasini rasmiy o‘rganishni yakunlagan.
Undan avval Ukraina sog‘liqni saqlash vaziri Maksim Stepanov “Sputnik V” vaksinasi Ukrainada ro‘yxatdan o‘tkazilmasligini ma’lum qilgandi.Uning aytishicha, “qaysidir siyosiy kuch Rossiya vaksinasini ro‘yxatdan o‘tkazish masalasida qandaydir vasvasa keltirib chiqargan”, ammo Kiyev “Sputnik V”ni ro‘yxatdan o‘tkazmaydi.
Meksika esa “Sputnik V” vaksinasini yetkazib berish bo‘yicha shartnoma imzolagan.
Izoh (0)