Rossiyaning “Sputnik V” vaksinasi Litva tomonidan rad etildi, Yevroittifoqda esa ilmiy maslahatlashuv bosqichidan o‘tdi

Litva bosh vaziri Ingrida Shimonite koronavirusga qarshi Rossiyaning “Sputnik V” vaksinasini sotib olishga hojat yo‘q, deb hisoblamoqda, chunki Yevropa Ittifoqining qo‘shma xaridlari yordamida G‘arbda ishlab chiqarilgan vaksinalar Litvaga keragicha yetkazib beriladi. Bu haqda “Interfaks” xabar berdi.

Bosh vazirning ta’kidlashicha, Litva “Sputnik V”ni Yevropa dori-darmon agentligi (EMA) tomonidan ro‘yxatdan o‘tkazilgan taqdirda ham sotib olmaydi. Shimonite bu haqda Rossiya vaksinasini sotib olish imkoniyatlarini izohlaganda aytib o‘tgan.

Hukumat rahbarining aytishicha, litvaliklar “transatlantika hamkorligidagi mamlakatlar”da ishlab chiqariladigan vaksinalar bilan emlanadi.

Bosh vazirning ta’kidlashicha, Rossiya hukumati vaksinadan geosiyosiy maqsadlarda foydalanmoqda. Uning so‘zlariga ko‘ra, o‘z aholisi hali to‘liq emlanmay turib, Rossiyaning vaksinani Yevropa mamlakatlari va boshqa davlatlarga taklif qilish istagi “navbatdagi geosiyosiy o‘yinga o‘xshaydi”. Shimonite Yevroittifoqdagi ayrim mamlakatlar EMA tomonidan tasdiqlanmagan vaksinalardan foydalanishga qaror qilganidan afsusdaligini bildirdi.

Shuningdek, EMA Rossiyaning “Sputnik V” vaksinasini Yevropa Ittifoqida ro‘yxatdan o‘tkazish uchun zarur bo‘lgan ilmiy maslahat bosqichini yakunlagani haqida xabar berildi.

“Keyingi qadam sifatida kompaniya ro‘yxatdan o‘tish guvohnomasini olish uchun ariza tayyorlashi mumkin”, — dedi EMA.

20-yanvar kuni Rossiya to‘g‘ridan to‘g‘ri investitsiya jamg‘armasi “Sputnik V”ni ro‘yxatdan o‘tkazish uchun ariza topshirgani haqida xabar qilgandi. Biroq EMA vaksina ishlab chiqaruvchi Gamaleya markazidan hali ariza olmagan. Yevroittifoqda ro‘yxatdan o‘tish muddati arizadan keyingina muhokama qilinishi mumkin, dedi Yevropa regulyatori.

Gamaleya markazining “Sputnik V” vaksinasi avgust oyida ro‘yxatdan o‘tkazilgan edi. Yevropada ushbu vaksinaga qiziqish boshqa kompaniyalar, xususan, AstraZeneca, Pfizer va BioNTech’ning vaksina yetkazib berishidagi uzilishlardan keyin kuchaygan. Bloomberg ma’lumotlariga ko‘ra, “Sputnik V” oldindan buyurtma olgan vaksinalar sonining ko‘pligi bo‘yicha to‘rtinchi o‘rinda turibdi.

Bundan avval Vengriya, Myanma, Livan va Serb Respublikasida ushbu vaksina ma’qullangan edi. Meksika esa “Sputnik V” vaksinasini yetkazib berish bo‘yicha shartnoma imzoladi.

Ukraina esa Rossiyaning “Sputnik V” vaksinasini ro‘yxatdan o‘tkazishdan bosh tortgan.