Покистонда Россиянинг «Спутник V» коронавирусга қарши вакцинасини рўйхатдан ўтказди. Бу ҳақда Россия тўғридан-тўғри инвестиция жамғармаси (РДИФ) маълумотига таяниб «Интерфакс» хабар берди.
«РДИФ Покистоннинг дори-дармонни назорат қилиш бошқармаси (DRAP — Drug Regulatory Authority of Pakistan) томонидан коронавирусга қарши «Спутник V» вакцинаси тасдиқланганлигини эълон қилади», — дейилади хабарда.
Хабарда, шунингдек, Покистон «Спутник V» вакцинасини тасдиқлаган дунёдаги 22-давлатга айлангани маълум қилинди. Россияда ўтказилган «Спутник V» клиник синовлари маълумотлари асосида вакцина Покистонда фавқулодда фойдаланиш учун рухсат бериш доирасида рўйхатдан ўтказилган.
РДИФ раҳбари Кирилл Дмитриев Покистон дунёдаги энг кўп аҳолига эга давлатлардан бири экани ва унинг «Спутник V» вакцинасини коронавирусга қарши дори-дармон миллий портфелига киритиши инсоният соғлиғини ҳимоя қилишда муҳим қадам бўлганини таъкидлади.
Аввалроқ Венгрияда «Спутник V» вакцинаси фойдаланиш учун маъқулланган эди. Унга кўра, Миллий соғлиқни сақлаш маркази «Спутник V» вакцинасини расмий ўрганишни якунлаган.
Ундан аввал Украина соғлиқни сақлаш вазири Максим Степанов «Спутник V» вакцинаси Украинада рўйхатдан ўтказилмаслигини маълум қилганди.Унинг айтишича, «қайсидир сиёсий куч Россия вакцинасини рўйхатдан ўтказиш масаласида қандайдир васваса келтириб чиқарган», аммо Киев «Спутник V»ни рўйхатдан ўтказмайди.
Мексика эса «Спутник V» вакцинасини етказиб бериш бўйича шартнома имзолаган.
Изоҳ (0)