Eronning Iran Aseman Airlines aviakompaniyasi O‘zbekistonga muntazam aviaqatnovlarni yo‘lga qo‘yish bo‘yicha Transport vazirligida uchrashuv o‘tkazdi, deya xabar qilmoqda vazirlik matbuot xizmati.
Ma’lum qilinishicha, 9-fevral kuni Transport vazirligida Eronning Iran Aseman Airlines aviakompaniyasi vakillari bilan uchrashuv bo‘lib o‘tdi.
Aviakompaniyaning tijorat masalalari bo‘yicha rais o‘rinbosari A.Asad hamda Persian Gulf Tourism sayyohlik shirkati ijrochi direktori M.Rahmanifar ishtirokida bo‘lib o‘tgan muzokaralarda O‘zbekiston va Eron o‘rtasida charter va muntazam aviaqatnovlarni yo‘lga qo‘yish masalalari muhokama qilindi.
Uchrashuvda Transport vazirligi Havo transportini rivojlantirish departamenti rahbari Jumayev O‘zbekistonga xorijiy aviakompaniyalarni jalb etish, parvozlar geografiyasini kengaytirish va chastotasini ko‘paytirish maqsadida amalga oshirilayotgan islohotlar to‘g‘risida mehmonlarga batafsil ma’lumotlar berib o‘tdi.
Shuningdek, Uzbekistan Airports boshqaruv raisining tijorat va turizmni rivojlantirish masalalari bo‘yicha o‘rinbosari Bektoshev esa O‘zbekistonning xalqaro aeroportlarida ziyoratchilarni tashuvchi xorijiy aviakompaniyalarga taqdim etiladigan imtiyozlarga to‘xtalib o‘tdi.
Eron aviakompaniyasi rahbariyati bu kabi muloqotlar o‘zaro manfaatli hamkorlikka yo‘l ochishidan umidvor ekanini izhor qildi. Dastlabki bosqichda aviakompaniya Tehron—Toshkent, Tehron—Buxoro yo‘nalishlarida charter qatnovlarini yo‘lga qo‘yish istagida ekanligini ma’lum qildi.
Aviakompaniya rejalariga ko‘ra, parvozlarni 2021-yilning mart oyidan boshlash ko‘zda tutilmoqda. Keyinchalik esa parvozlarni muntazam ravishda amalga oshirishga kirishiladi.
Avvalroq Misrning Fly Egypt aviakompaniyasi O‘zbekistonga doimiy reyslarni amalga oshirish uchun ruxsatnoma olgani, Tojikiston va O‘zbekiston o‘rtasida muntazam aviaqatnovlar tiklangani hamda BAA aviakompaniyasi O‘zbekistonga muntazam parvozlarni amalga oshirish uchun ruxsatnoma olgani haqida xabar berilgandi.
Izoh (0)