Навоий вилояти Нурота туманида 7 февраль, якшанба куни содир бўлган йўл-транспорт ҳодисасида икки киши ҳалок бўлди. Бу ҳақда «Бу кун» информацион дастурида хабар қилинди.
Маълум қилинишича, 7 февраль куни соат 14:00 да Нурота тумани ҳудудидан ўтувчи 4Р–55 автомобиль йўлининг Самарқанд—Нурота йўналиши бўйича ҳаракатланиб келаётган 26 ёшли ҳайдовчи бошқарувидаги Cobalt ўзидан олдинда ҳаракатланиб кетаётган автомашинани қувиб ўтаётган вақтида қарама-қарши йўналишда ҳаракатланиб кетаётган Tico билан ўзаро тўқнашиб кетган.
Содир бўлган автоҳалокат натижасида ёнғин келиб чиқиб, Tico ҳайдовчиси куйиш тан жароҳатларини олиб, воқеа жойида ҳалок бўлган. Автомобильнинг олд ўриндиғида ўтирган йўловчи ҳам кўрсатилган ёрдамга қарамасдан ҳалок бўлган.
Шунингдек, орқа ўриндиқдаги икки нафар йўловчи ҳам турли тан жароҳатлари олган. Ҳозирда улар Нурота тумани марказий шифохонасининг жонлантириш бўлимига ётқизилган.
Юқоридаги ҳолат бўйича Нурота туман ИИБ томонидан терговга қадар суриштирув ишлари олиб борилмоқда.
Бундан аввал Зарафшонда Matiz ва юк машинаси тўқнашуви оқибатида ҳайдовчилардан бири вафот этгани, Тошкентда «КамАЗ»га йўл бермаган Equinox Nexia’га, юк машинаси эса йўл четидаги бинога бориб урилгани ҳамда Қорақалпоғистонда маст ҳайдовчи бошқарувидаги Nexia-3 йўл четида турган бешта машинага бориб урилгани ҳақида хабар берилганди.
Изоҳ (0)