2021-yil 1-martdan boshlab O‘zbekiston fuqarolari va O‘zbekistonda doimiy yashovchi fuqaroligi bo‘lmagan shaxslardan joylashtirish vositasida ular yashagan har bir kun uchun Vazirlar Mahkamasi tomonidan belgilanadigan miqdorda turistik (mehmonxona) yig‘im undiriladi.
Bu haqda 9-fevral kuni imzolangan “O‘zbekiston Respublikasida ichki va ziyorat turizmini yanada rivojlantirish chora-tadbirlari to‘g‘risida”gi Prezident farmonida ko‘zda tutilgan.
Yig‘im miqdori Vazirlar Mahkamasi tomonidan belgilanadi. Bunda yig‘imdan tushgan mablag‘lar ichki turizmni targ‘ib qilish va rag‘batlantirish, turizm mavsumi past bo‘lgan davrda joylashtirish vositalarining bandligini ta’minlashga qaratilgan chora-tadbirlarni moliyalashtirishga yo‘naltiriladi.
Spot ma’lumotlariga ko‘ra, O‘zbekiston fuqarolaridan ham ichki turistik yig‘im undirilishi haqida 2020-yilning oxirlarida ma’lum bo‘lgandi. Unda yig‘imni bazaviy hisoblash miqdorining 0,5 foizi miqdorida etib belgilash rejalashtirilgandi. Hozirda u faqat chet el fuqarolaridan undiriladi.
Izoh (0)