Yengil vazn toifasida UFC chempioni Habib Nurmagomedovning amakivachchalari Abubakar va Umar Nurmagomedov 27-mart kuni Las-Vegasda bo‘lib o‘tadigan UFC 260 musobaqasida ishtirok etadi.
Habib o‘z jamoasi vakillarining yaqin oradagi jang sanalarini e’lon qildi.
“Fevral oxirida Las-Vegasga ketaman, menimcha, butun mart oyini o‘sha yerda o‘tkazaman.
6-mart kuni Islom jang qiladi, 13-martda Zubayra, 27-mart kuni esa Abubakar va Umar. 2-aprelda Bellator’da Usmon jang qiladi.
Shunday ekan bizda mart oyi va aprel boshi juda jiddiy bo‘ladi”, — deydi Habib.
Habib amakivachchalarining raqiblari borasida ma’lumot bermagan.
Eslatib o‘tamiz, Maxachev 6-mart kuni UFC 259 musobaqasida Dryu Dober bilan jang qiladi, Zubayra Tuxugov esa 13-martda Rikardo Ramosga qarshi oktagonga ko‘tariladi.
Eslatib o‘tamiz, bu Abubakar va Umar uchun UFC’dagi ikkinchi jang bo‘ladi. Abubakar 2019-yilning noyabrida UFC’da debyut qilgan va unda birinchi raunddayoq David Zavadaga taslim bo‘lgandi. Umar esa promoushendagi ilk jangini 2021-yilning yanvar oyida o‘tkazib, unda qozog‘istonlik Sergey Morozovdan ustun keldi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)