Россиянинг «Спутник V» вакцинаси Литва томонидан рад этилди, Евроиттифоқда эса илмий маслаҳатлашув босқичидан ўтди

Литва бош вазири Ингрида Шимоните коронавирусга қарши Россиянинг «Спутник V» вакцинасини сотиб олишга ҳожат йўқ, деб ҳисобламоқда, чунки Европа Иттифоқининг қўшма харидлари ёрдамида Ғарбда ишлаб чиқарилган вакциналар Литвага керагича етказиб берилади. Бу ҳақда «Интерфакс» хабар берди.

Бош вазирнинг таъкидлашича, Литва «Спутник V»ни Европа дори-дармон агентлиги (EMA) томонидан рўйхатдан ўтказилган тақдирда ҳам сотиб олмайди. Шимоните бу ҳақда Россия вакцинасини сотиб олиш имкониятларини изоҳлаганда айтиб ўтган.

Ҳукумат раҳбарининг айтишича, литваликлар «трансатлантика ҳамкорлигидаги мамлакатлар»да ишлаб чиқариладиган вакциналар билан эмланади.

Бош вазирнинг таъкидлашича, Россия ҳукумати вакцинадан геосиёсий мақсадларда фойдаланмоқда. Унинг сўзларига кўра, ўз аҳолиси ҳали тўлиқ эмланмай туриб, Россиянинг вакцинани Европа мамлакатлари ва бошқа давлатларга таклиф қилиш истаги «навбатдаги геосиёсий ўйинга ўхшайди». Шимоните Евроиттифоқдаги айрим мамлакатлар ЭМА томонидан тасдиқланмаган вакциналардан фойдаланишга қарор қилганидан афсусдалигини билдирди.

Шунингдек, EMA Россиянинг «Спутник V» вакцинасини Европа Иттифоқида рўйхатдан ўтказиш учун зарур бўлган илмий маслаҳат босқичини якунлагани ҳақида хабар берилди.

«Кейинги қадам сифатида компания рўйхатдан ўтиш гувоҳномасини олиш учун ариза тайёрлаши мумкин», — деди EMA.

20 январь куни Россия тўғридан-тўғри инвестиция жамғармаси «Спутник V»ни рўйхатдан ўтказиш учун ариза топширгани ҳақида хабар қилганди. Бироқ EMA вакцина ишлаб чиқарувчи Гамалея марказидан ҳали ариза олмаган. Евроиттифоқда рўйхатдан ўтиш муддати аризадан кейингина муҳокама қилиниши мумкин, деди Европа регулятори.

Гамалея марказининг «Спутник V» вакцинаси август ойида рўйхатдан ўтказилган эди. Европада ушбу вакцинага қизиқиш бошқа компаниялар, хусусан, AstraZeneca, Pfizer ва BioNTech’нинг вакцина етказиб беришидаги узилишлардан кейин кучайган. Bloomberg маълумотларига кўра, «Спутник V» олдиндан буюртма олган вакциналар сонининг кўплиги бўйича тўртинчи ўринда турибди.

Бундан аввал Венгрия, Мьянма, Ливан ва Серб Республикасида ушбу вакцина маъқулланган эди. Мексика эса «Спутник V» вакцинасини етказиб бериш бўйича шартнома имзолади.

Украина эса Россиянинг «Спутник V» вакцинасини рўйхатдан ўтказишдан бош тортган.