EFC. Azamat Nutfillayev rossiyalik raqibini 1-raunddayoq nokautga uchratdi, Dadaxon Hasanovda ham g‘alaba

Rossiyaning Moskva shahrida 9-fevral, seshanba kuni EFC 33 musobaqasi o‘tkazilmoqda.

MMA kechasining dastlabki ikki jangi o‘zbekistonlik yakkakurashchilar ishtirokida bo‘lib o‘tdi.

Dadaxon Hasanov (10-6) mahalliy sportchi Andrey Kurbatovga (6-5) qarshi jang qildi. Bellashuvning birinchi raundi rossiyalik sportchining kichik ustunligida o‘tdi, ikkinchi raundda vaziyat biroz tenglashdi. So‘nggi raund esa to‘liq o‘zbekistonlik jangchining ustunligida o‘tdi. Yakunda hakamlar qaroriga ko‘ra Hasanov g‘olib deb topildi.

Yana bir jang og‘ir vazn toifasida oktagonga chiqayotgan Azamat Nutfillayev (7-0) va Gennadiy Gusev (1-2) o‘rtasida kechdi. Unda o‘zbekistonlik yakkakurashchi birinchi raundning o‘zidayoq raqibini nokautga uchratdi.

Shu tariqa Nutfillayevning MMA’dagi g‘alabali seriyasi davom etdi.

Janglar videosini bu yerda tomosha qilish mumkin — video.