Қозоғистонда яқин кунларда 30 даражагача совуқ бўлиши кутилмоқда, деб хабар беради Tengrinews мамлакат гидрометеорология хизматига таяниб.
Маълум қилинишича, 9—11 февраль кунлари Қозоғистон ҳудудининг катта қисми Скандинавия туманларидан келадиган совуқ антициклон таъсири остида бўлади, натижада ҳаво ҳарорати 23-30 даражагача, мамлакат шарқида эса 28-33 даражагача тушиб кетиши кутилмоқда.
Ғарбий ҳудудларга эса Атлантика томонидан келадиган навбатдаги циклон ўз таъсирини ўтказади, ёғингарчилик (ёмғир, қор), музлама, туман бўлиши, шунингдек, ҳаво ҳарорати кўтарилиши кузатилади.
Айни пайтда Европада ҳам совуқ ҳаво ҳукм суриб, кучли қор бўронлари кузатилмоқда. Хусусан, Германия ва Нидерландияда кучли қор туфайли транспорт ҳаракати тўхтаб қолган.
Сўнгги кунларда Ўзбекистонда эса баҳорий илиқ об-ҳаво кузатилмоқда. «Ўзгидромет» хабарига кўра, 9 февраль куни ҳам ҳаво илиқ бўлиб, баъзи ҳудудларда бироз ёмғир ёғиши мумкин.
Изоҳ (0)