Amerikalik bokschi, 1976-yilgi Olimpiya o‘yinlari chempioni va super og‘ir vazn toifasida sobiq Jahon chempioni Leon Spinks (26-17-3, 14 KO) 5-fevral kuni 67 yoshida vafot etdi.
Sobiq bokschining o‘limiga onkologik kasallik sabab bo‘lgan. Leon va uning oilasi bu bilan besh yildan buyon kurashib kelayotgandi.
Spinks boks olamida afsonaviy Muhammad Alini mag‘lub etgani bilan mashhur. Leon 1978-yilda hakamlar qaroriga ko‘ra Alini mag‘lub etib, super og‘ir vazn toifasida WBC va WBA kamarlariga ega chiqqandi. Muhammad Ali faoliyati davomida faqat shu jangda kamarni himoya qila olmagan.
Spinks prof ringdagi 8-jangidayoq bir yo‘l ikkita kamarni qo‘lga kiritgan tarixdagi ilk bokschiga aylangandi. 2020-yilda uning rekordini o‘zbekistonlik bokschi Murodjon Ahmadaliyev takrorlagandi.
Spinks Ali bilan revansh jangi sabab WBC kamarining majburiy himoyasidan voz kechadi va bu toifa chempionligidan ayriladi. Revanshda esa Ali g‘alaba qozonib, o‘ziga WBA kamarini qaytarib oladi.
Spinks bokschilik faoliyatini 1995-yilda yakunlaydi. Keyinchalik u moliyaviy va sog‘lig‘i bilan bog‘liq muammolarga duch keladi. U Olimpiada chempioni Maykl Spinksning akasi va yarim o‘rta vazn toifasida Jahon chempioni Kori Spinksning otasi hisoblanadi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)