Америкалик боксчи, 1976 йилги Олимпия ўйинлари чемпиони ва супер оғир вазн тоифасида собиқ Жаҳон чемпиони Леон Спинкс (26-17-3, 14 КО) 5 февраль куни 67 ёшида вафот этди.
Собиқ боксчининг ўлимига онкологик касаллик сабаб бўлган. Леон ва унинг оиласи бу билан беш йилдан буён курашиб келаётганди.
Спинкс бокс оламида афсонавий Муҳаммад Алини мағлуб этгани билан машҳур. Леон 1978 йилда ҳакамлар қарорига кўра Алини мағлуб этиб, супер оғир вазн тоифасида WBC ва WBA камарларига эга чиққанди. Муҳаммад Али фаолияти давомида фақат шу жангда камарни ҳимоя қила олмаган.
Спинкс проф рингдаги 8-жангидаёқ бир йўл иккита камарни қўлга киритган тарихдаги илк боксчига айланганди. 2020 йилда унинг рекордини ўзбекистонлик боксчи Муроджон Аҳмадалиев такрорлаганди.
Спинкс Али билан реванш жанги сабаб WBC камарининг мажбурий ҳимоясидан воз кечади ва бу тоифа чемпионлигидан айрилади. Реваншда эса Али ғалаба қозониб, ўзига WBA камарини қайтариб олади.
Спинкс боксчилик фаолиятини 1995 йилда якунлайди. Кейинчалик у молиявий ва соғлиғи билан боғлиқ муаммоларга дуч келади. У Олимпиада чемпиони Майкл Спинкснинг акаси ва ярим ўрта вазн тоифасида Жаҳон чемпиони Кори Спинкснинг отаси ҳисобланади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)