Қирғизистон миллий хавфсизлик хизмати раҳбари Камчибек Ташиев даволаниш учун хорижга кетаётганини маълум қилди. Унинг даволаниш таътили 6 февралдан бошланади, дея хабар берган «Kloop.кг».
«6 февраль куни тонгда шифокорим Калдарбек Абдраманов тавсияси билан даволаниш учун чет элга кетаман. Кетишга мажбурман, мен учун дуо қилинглар», — деб ёзган Камчибек Ташиев Facebook’даги саҳифасида.
Хабарга кўра, амалдорда юрак билан боғлиқ муаммолар кузатилган. Ташиев 2020 йил ноябрь ойининг охирида ҳам касалхонага ётқизилганди. У мамлакатда коронавирус пандемияси кучайган даврда ўлим хавфини туғдирадиган икки томонлама ўткир пневмонияни бошдан кечирган.
Аввалроқ Қирғизистонда бир ҳафта ичида иккинчи собиқ бош вазир ҳибсга олингани ҳақида хабар берилган. Собиқ бош вазир Кубаничбек Жумалиев коррупция жиноятларини содир этганликда гумон қилинмоқда. Ундан олдин Қирғизистоннинг яна бир собиқ бош вазири Муҳаммадкалий Абилгазиев ноқонуний йўллар билан бойлик орттирганликда гумонланиб 26 январь куни ушланган ва 28 январь куни қамоққа олинган, суд қарорига кўра 2021 йил 26 мартга қадар қамоқда ушлаб турилади.
Эслатиб ўтамиз, 2021 йил 3 февралда Қирғизистон парламенти 41 ёшли Улуғбек Марипов номзодини бош вазир лавозимига тасдиқлаган. Улуғбек Марипов бош вазирлик курсисига ўтирганидан кейин ўзининг қондош укаси Бахитбек Мариповни Ўш вилоятининг Новқат тумани ҳокимлиги лавозимидан четлатган.
Мавзуга доир:
Изоҳ (0)