Belgiya hukumati COVID-19 bilan bog‘liq epidemiologik vaziyat barqarorlashishi munosabati bilan karantin choralarini yumshatadi. Bu haqda mamlakat bosh vazir Aleksandr De Kro e’lon qildi, deb yozmoqda “Interfaks”.
Mamlakatda 8-fevraldan dam olish maskanlari va lagerlar, 13-fevraldan hayvonot bog‘lari va sartaroshxonalar ochiladi.
“Sartaroshxonalarning epidemiologik qoidalarga qat’iy rioya qilgan holda faoliyat yuritishiga ruxsat berildi”, — dedi bosh vazir. Tibbiy bo‘lmagan xizmatlar, masalan, go‘zallik salonlari, massaj, tatuirovka, pirsing xonalari va shu kabi bevosita ijtimoiy aloqalarni o‘z ichiga olgan boshqa xizmatlar 1-martdan o‘z ishini davom ettirishi mumkin.
Xodimlar qat’iy sanitariya choralariga rioya qilishi va muntazam ravishda COVID-19’ga test topshirib turishi kerak. Bunday xizmatlarni uyda ko‘rsatish taqiqlanadi.
13-fevraldan boshlab ko‘chmas mulk agentlari sotuvdagi uylarni ko‘rish istagida bo‘lgan mijozlarga hamrohlik qilishi mumkin.
De Kroning aytishicha, dekabr oyining boshidan beri infeksiya bilan bog‘liq vaziyat barqarorlashib, kasalxonaga yotqizilayotgan bemorlar va kasallikdan o‘limlar soni kamaymoqda. Mamlakatdagi barqarorlikka koronavirusning yangi, yuqumliroq bo‘lgan shtammlarining tarqalishi boshlangach erishildi. Boshqa mamlakatlarda ularning tarqalishi sezilarli darajada salbiy ta’sir ko‘rsatdi. Bosh vazir Belgiyada o‘zini oqlagan cheklov choralari va fuqarolarning intizomi tufayli ushbu barqarorlikka erishilgan deb hisoblamoqda.
Avvalroq Moskva meri koronavirusdan tuzalganlar uchun cheklovlarni yumshatishga va’da bergandi. Uning so‘zlariga ko‘ra, agar biror kishi allaqachon kasallikdan tuzalgan bo‘lsa, unda “nega u uyda o‘tirishi kerak?”.
Turkiya esa 2021-yilning aprel oyidan sayyohlar uchun turizm mavsumini boshlaydi. Mavsum avval O‘rta Yer dengizi, keyinroq Egey dengizi sohillarida yo‘lga qo‘yiladi.
Izoh (0)