Prezident Gurbanguli Berdimuhamedov ketma-ket uch kun Turkmaniston hukumati a’zolari bilan ularning 2020-yildagi faoliyati natijalariga bag‘ishlangan majlis o‘tkazdi. Bu haqda “Xronika Turkmenistana” xabar qildi.
Ta’kidlanishicha, 4-fevral kuni bo‘lib o‘tgan yig‘ilish qurilish-sanoat kompleksini rivojlantirishga bag‘ishlandi.
Qurilish va sanoat uchun mas’ul vazirlar va rahbarlarga so‘z berishdan oldin Berdimuhamedov ushbu soha milliy iqtisodiyot uchun muhim sohalardan biri ekanligini ta’kidladi. Uning aytishicha, katta miqdordagi davlat mablag‘lari kiritilishiga qaramay, ushbu sohada kamchiliklar va foydalanilmagan zaxiralar mavjud.
Davlat rahbari birinchi bo‘lib Qurilish va arxitektura vaziri Rahim Gandimovning ishini tanqid qildi, unga ilg‘or texnologiyalarni qurilishga yanada kengroq joriy etish, shuningdek, mintaqaning seysmik faolligini hisobga olgan holda me’moriy loyihalarni ishlab chiqishga ilmiy yondashish topshirildi.
Navbatdagi hisobotni Prezidentning o‘g‘li, sanoat va qurilish ishlab chiqarish vaziri Sardar Berdimuhamedov taqdim etdi. U mahalliy qurilish materiallari ishlab chiqarish rejasi bajarilganini e’lon qildi.
Kichik Berdimuhamedov “Turkman alabayi” Xalqaro assotsiatsiyasi uchun itlarga boshpana qurish haqida gapirib, ushbu ishlarni Mustaqillik kuniga (27-sentabr) qadar yakunlash uchun barcha imkoniyatlarni ishga solayotganini aytdi.
Sardar Berdimuhamedovning ishi bo‘yicha davlat rahbarining hech qanday shikoyati bo‘lmagan, ammo unga korxonalarni to‘liq quvvatda ishlatish, qurilish obyektlarini import o‘rnini bosuvchi sanoat va qurilish mollari bilan ta’minlashni yaxshilash, yangi elektron mahsulotlar ishlab chiqarishni davom ettirish bo‘yicha ko‘rsatma berildi.
Energetika vaziri Charimirat Purchekov aholi va sanoat obyektlarini elektr energiyasi bilan uzluksiz ta’minlash va eksport yo‘nalishlarini kengaytirish bo‘yicha ishlar to‘g‘risida hisobot berdi.
Hisobot natijasida vazirga gaz turbinasi zavodlari, elektr stansiyalari va liniyalarida ta’mirlash ishlarini olib borish, shuningdek, ularni zaxira va sarf materiallari bilan ta’minlash bo‘yicha topshiriqlar berildi. “Import qilingan xomashyo to‘g‘ridan to‘g‘ri ishlab chiqaruvchilardan qulay narxda sotib olinishi kerak”, – dedi Berdimuhamedov.
Prezident ta’kidlashicha, umumiy ishlab chiqarish quvvatining atigi 44,8 foizi energetika sohasiga to‘g‘ri keladi va mamlakatdagi elektr stansiyalarida o‘rnatilgan 36 ta gaz turbinasidan faqat ikkitasi kapital ta’mirlangan va yana ikkitasida ta’mirlash ishlari davom etmoqda. To‘qqizta obyektda gaz turbinasi uskunalarini kapital ta’mirlash kerak.
29-dekabr kuni Ashxobodga va Turkmanistonning Axal, Lebap hamda Toshhovuz viloyatlaridagi bir qator aholi punktlariga elektr energiyasi yetkazib berish Maridagi bug‘ va gaz elektr stansiyasida sodir bo‘lgan portlash tufayli to‘xtatilgan. Baxtsiz hodisa sifatsiz texnik xizmat tufayli sodir bo‘lgan.
Turkmanximiya davlat konserni rahbari Niyazli Niyazlev har xil turdagi kimyoviy mahsulotlar ishlab chiqarish rejalari va kimyo korxonalarini ta’mirlash va modernizatsiya qilish bo‘yicha ishlar to‘g‘risida so‘zlab berdi.
Shunga qaramay, Berdimuhamedov Niyozlevning ishidan norozi bo‘ldi. Davlat rahbarining ta’kidlashicha, Tejenkarbamid zavodi quvvati atigi 53,7 foizga, Marikarbamid zavodi 62,5 foizga, Mariazot ishlab chiqarish birlashmasi esa atigi 23 foizga foydalanishi ta’kidlandi. Natijada Niyazlevga qattiq tanbeh berildi.
Ashxobod hokimi Yaztagan Gilijov 2020-yilda poytaxt obodonlashtirilishi haqida gapirdi.
“Xalqimiz rahbarining faoliyati tufayli oq marmar poytaxt – Ashxobodning tashqi qiyofasi tanib bo‘lmaydigan darajada o‘zgarib ketdi, hayot darajasi yuqoriligi esa xalqaro standartlarga javob beradi”, – dedi Gilijov.
Ma’lum qilinishicha, 2020-yili shaharda 22 ta turli xil obyektlar ochilib, 1984 ta oila uchun uy-joy qurilgan.
Prezident bu yil hokimlarga Turkmaniston mustaqilligining 30 yilligiga qadar ochilishi rejalashtirilgan yangi binolar qurilishini nazorat qilishni buyurdi.
Turkmaniston davlat arxitektura va qurilish instituti rektori Bayrammyrat Atamanov malakali mutaxassislar tayyorlash to‘g‘risida gapirdi, ularning yordamida Axal viloyatining yangi markazi uchun binolar va alabay itlarini ko‘paytirish uchun maxsus binolar loyihalari ishlab chiqilgani va amalga oshirilganini ma’lum qildi. Berdimuhamedov Atamanovga universitetda o‘quv va tarbiyaviy ishlarni takomillashtirishni, yoshlarni ham o‘qitishning, ham vatanparvarlik tarbiyasining zamonaviy usullarini joriy etishni buyurdi.
Bundan tashqari, Atamanovga Turkmanistonda yo‘l qurilishida foydalanish uchun materiallar ishlab chiqarish imkoniyatlarini o‘rganish topshirildi.
Uchrashuv yakunida Prezident qurilish va sanoat majmuasi uchun mas’ul bo‘lgan bosh vazir o‘rinbosari Shamuhammet Durdilevga, vazirlar va ixtisoslashgan korxonalar rahbarlariga bir qator ko‘rsatmalar bergan.
Avvalroq Berdimuhamedov olimlarga kartoshka hosildorligini oshirishni buyurgani, Rossiyaning Turkmanistondagi elchixonasi elektron pochtasi chet elga chiquvchi fuqarolarning arizasi ko‘pligidan yuklamani ko‘tarolmagani hamda Berdimuhamedov go‘zallik tanlovida g‘olib bo‘lgan itlar uchun beriladigan medal dizaynini ma’qullagani haqida xabar berilgandi.
Izoh (0)