Ispaniya Sog‘liqni saqlash vazirligi AstraZeneca kompaniyasi va Oksford universiteti tomonidan yaratilgan koronavirusga qarshi vaksina bilan emlanadiganlar uchun 55 yoshni yosh chegarasi etib belgilab qo‘ydi, deb xabar beradi “RBK”.
Shuningdek, vaksina bilan faqat 18 yoshdan kattalar emlanishi mumkin.
Vaksinaning dastlabki dozalari Ispaniyaga joriy dam olish kunlari olib kelinadi va butun mamlakat bo‘ylab tarqatiladi. Birinchi navbatda tibbiyot va ijtimoiy xizmat xodimlari emlanadi.
Hozircha Ispaniyada koronavirusga qarshi Pfizer/BioNTech, shuningdek, Moderna vaksinalaridan foydalanilmoqda.
Yevropa Ittifoqi AstraZeneca tomonidan yaratilgan vaksinadan foydalanishni ma’qullagan edi. Dori vositalari bo‘yicha Yevropa agentligi undan 18 yoshdan kattalar foydalanishini tavsiya qilgan. Shu bilan birga, sinov ishtirokchilarining aksariyatining yoshi 55 dan oshmagan va keksa yoshdagi insonlarda uning samaradorligi to‘g‘risida yetarlicha ma’lumot yo‘q.
AstraZeneca vaksinasining o‘rtacha samaradorligi 70 foiz etib belgilangan. Barcha sinovlarda vaksinaning ikki varianti testdan o‘tkazilgan: ulardan biri 90 foiz samaradorlik ko‘rsatgan bo‘lsa, ikkinchisida ushbu ko‘rsatkich — 62 foiz.
Avvalroq AstraZeneca Yevropa Ittifoqiga 2021-yilning birinchi choragida vaksina yetkazib berishni 67 foizga qisqartirishini, sababi Buyuk Britaniya bilan YIdan avvalroq shartnoma tuzganini ma’lum qilgandi.
Eslatib o‘tamiz, 2020-yil dekabrda Buyuk Britaniya dunyoda birinchi bo‘lib COVID-19’ga qarshi AstraZeneca vaksinasidan foydalanishga ruxsat bergan edi. Undan keyin Hindiston va Bahraynda ham ushbu vaksinadan foydalanish ma’qullangan.
Izoh (0)